بھارتی ریاست اتر پردیش وچ طوفان نے تباہی مچا دتی، 90 بندے ہلاک
بھارتی ریاست اترپردیش وچ آئے خطرناک طوفان نے ہن تک 90 لوکاں دی جان لے لئی اے جد کہ گنتی ودھن دا خدشہ اے۔ میڈیا رپورٹاں دے مطابق اترپردیش وچ آؤن والے شدید طوفان، بارش تے اسمانی بجلی پاروں گھٹ توں گھٹ 90 بندے ہلاک ہو گئے نیں، جد کہ درجناں زخمی نیں۔
بھارتی حکام دے مطابق تیز ہواواں نے رکھ (درخت)، بجلی دے کھمبے تے بل بورڈز ڈا دتے نیں، جد کہ کئی مکان وی ڈھہہ گئے نیں۔
رپورٹاں دے مطابق سب توں ودھ متاثرہ علاقیاں وچ فتح پور، بریلی، پریاگراج تے بھدوہی شامل نیں۔ امدادی ادارے متاثرہ علاقیاں وچ ریسکیو تے بحالی دا کم جاری رکھے ہوئے نیں۔
بھارتی محکمہ موسمیات نے ہور خراب موسم، تیز ہواواں تے ژالہ باری (گڑے مارن) دا الرٹ وی جاری کیتا اے۔ حکام نے شہریاں نوں بلا ضرورت گھراں توں باہر نہ نکلن دی ہدایت دتی اے۔
