بھارت: ویاہ وچ سونے دی چین نہ دین تے سہوریاں نے نویں نویلی وہٹی نوں قتل کر دتا
بھارت وچ ظالم سہوریاں نے ویاہ وچ سونے دی چین نہ دین تے نونہہ نوں بے دردی نال قتل کر دتا۔ بھارتی میڈیا دے مطابق، ایس مہینے 23 ورھیاں دی سنجو کماری دا ویاہ ونود پال ناں دے بندے نال ہویا سی۔ سنجو دے ماں پیو نے دھی دا ویاہ اپنی پہنچ توں ودھ دھوم دھام نال کیتا، جس وچ اوہناں نے دھی نوں دتیج (جہیز) وچ 4 لکھ روپے نقد، موٹر سائیکل، فریج، فرنیچر تے بھانڈیاں سمیت سہوریاں نوں تحفے وی دتے۔
میڈیا رپورٹاں وچ دسیا گیا اے کہ لاڑے دے گھر والیاں نے ویاہ والے دن سونے دی چین دی منگ وی کیتی سی، جس تے سنجو دے گھر والیاں نے چھیتی دین دا وعدہ کیتا۔ ایس بارے سنجو دے بھرا شیوم نے دسیا کہ میری بھین نوں سہوریاں ولوں طعنے دتے جاندے سن کہ “ویاہ تے بڑا دھوم دھام نال کیتا پر اک سونے دی چین نہ دے سکے”۔ شوہر، ساس، سہورے تے نند نے سنجو نوں ذہنی تے جسمانی تشدد دا نشانہ بنایا تے گھر والیاں نال رابطہ وی نہیں کرن دیندے سن۔
شیوم دے مطابق، اوہنے اپنے بہنوئی ونود نال رابطہ کیتا تے سنجو دے گھر آؤن بارے پچھیا، جس تے سنجو دی ساس نے فون کھوہندے ہوئے آکھیا کہ “ہن تہاڈی بھین جیوندی نہیں آئے گی، اوہدی لاش ای نکلے گی”۔ فون کال تے اوہنے اپنی بھین دے چیکھن دی آواز سنی تے فیر کال کٹ گئی۔
ٹبر دا الزام اے کہ سنجو دا گلا گھٹ کے اوہنوں قتل کیتا گیا تے ہر طرح دا ثبوت مٹاون لئی اوہدا سنسکار (آخری رسومات) وی کر دتا گیا۔ میڈیا رپورٹاں دے مطابق، سنجو دے گھر والیاں نے سہوریاں دے خلاف پولیس وچ شکایت درج کروائی اے، جس تے کارروائی کردیاں پولیس نے ساس نوں گرفتار کر لیا اے، جد کہ پرچے وچ نامزد دوجے ملزماں دی گرفتاری لئی چھاپے مارے جا رہے نیں۔ پولیس دے مطابق، پچھ گچھ دے دوران ساس سمترا دیوی نے دعویٰ کیتا اے کہ سونے دی چین پاروں جھگڑا ہویا سی جس توں بعد سنجو نے خودکشی کر لئی۔
