ٹرمپ چین وچ: امریکی وفد دے ارکان نوں جاسوسی دا ڈر، فون تے لیپ ٹاپ چھڈ دتے
امریکہ دے صدر ڈونلڈ ٹرمپ 2017 توں بعد پہلی واری چین دے دورے تے گئے نیں۔ پچھلے 10 سالاں وچ کسے وی موجودہ امریکی صدر دا ایہ پہلا چین دا دورہ اے۔ امریکی میڈیا دے دعویاں پاروں ٹرمپ دے نال چین گئے افسراں نوں جاسوسی دا ڈر پے گیا اے۔ امریکی وفد دے ارکان اپنے فون تے لیپ ٹاپ چھڈ کے چین گئے نیں۔
میڈیا دیاں رپورٹاں دے مطابق ڈونلڈ ٹرمپ دے دورہ چین دے دوران امریکی میڈیا نے اک وڈی حیران کن خبر چھاپی اے۔ رپورٹاں دسدیاں نیں کہ امریکی افسراں نوں چین وچ جاسوسی دا بوہت خوف اے۔ ایسے لئی امریکی وفد دے ارکان اپنے اصلی فون تے لیپ ٹاپ نال نہیں لے کے گئے۔ اوہناں کول جیہڑے فون تے لیپ ٹاپ نیں، اوہ عارضی نیں۔ امریکی وفد نوں ایہ ہدایت وی دتی گئی اے کہ ہر جگہ یو ایس بی (USB) دا استعمال نہ کرن۔
امریکی وفد نوں بالکل نویں تے خالی فون تے لیپ ٹاپ دتے گئے نیں، جنہاں وچ کوئی پرانا ڈیٹا یا نجی معلومات نہیں اے۔ ایہناں نوں صرف دورے دے دوران ضروری گلاں باتاں لئی ورتیا جائے گا۔ دورے توں بعد ایہناں ساریاں ڈیوائسز نوں تباہ کر دتا جائے گا یا مکمل طور تے فارمیٹ کیتا جائے گا تاکہ کوئی وائرس امریکی نیٹ ورک وچ نہ آ سکے۔
رپورٹ دے مطابق امریکی افسراں دی ایس احتیاط دا صاف مطلب ایہ وے کہ امریکی حکومت نے پہلاں ای من لیا سی کہ چین وچ اوہناں دے ہر ڈیجیٹل آلے تے نظر رکھی جائے گی۔ ایسے لئی اوہناں نے اپنے فون تے لیپ ٹاپ گھرے چھڈ کے جان دا فیصلہ کیتا۔
واضح رہوے کہ 2017 توں بعد ڈونلڈ ٹرمپ پہلی وار چین گئے نیں۔ جمعرات نوں بیجنگ وچ ٹرمپ تے شی جن پنگ دے وچکار دو پاسہ ملاقات ہوئی۔ ایس توں پہلاں ٹرمپ دا شاندار استقبال کیتا گیا تے جن پنگ دی موجودگی وچ اوہناں نوں گارڈ آف آنر وی دتا گیا۔ ٹرمپ دے ایس دورے دا مقصد دوواں ملکاں وچکار تجارت نوں ودھانا تے جیہڑے رولے پئے ہوئے نیں اوہناں نوں پیار نال حل کرنا اے۔ ایس توں علاوہ ایران جنگ تے تائیوان نوں امریکہ ولوں ہتھیار ویچن ورگے سنگین مسئلیاں تے وی گل بات ہونی اے۔
