مضبوط پالیسی قدماں نے پاکستان دی معاشی بحالی نوں سہارا دتا، آئی ایم ایف نے جائزہ رپورٹ جاری کر دتی
عالمی مالیاتی فنڈ (آئی ایم ایف) دا کہنا اے کہ تگڑے پالیسی قدماں دے تسلسل نے ناصرف پاکستان دی معاشی بحالی نوں سہارا دتا اے، بلکہ معیشت نوں باہرلے جھٹکیاں دے خلاف کھلوون لئی مضبوط وی کیتا اے۔
آئی ایم ایف نے پاکستان لئی “توسیعی فنڈ سہولت” دے تحت تیجے جائزے تے “لچک و پائیداری سہولت” دے دوجے جائزے دی رپورٹ جاری کر دتی اے۔
آئی ایم ایف رپورٹ دے اہم نکتے:
معاشی بہتری: مالی سال 2026 دی پہلی چھاہی (ششماہی) وچ جی ڈی پی دی ترقی وچ تیزی آئی، مہنگائی قابو وچ رہی، تے کرنٹ اکاؤنٹ مجموعی طور تے برابر رہا۔ زرمبادلہ دے ذخائر دی بحالی وی پرانے اندازیاں توں بہتر رہی اے۔
پالیسی اثرات: رپورٹ دے مطابق لگاتار تگڑے پالیسی قدماں پاروں پاکستان دی معاشی بحالی ممکن ہوئی اے، جیندے نال باہرلے معاشی جھٹکیاں نوں سہن دی طاقت ودھ گئی اے۔
عالمی حالات دے خطرے: جائزہ رپورٹ وچ خبردار کیتا گیا اے کہ مشرقِ وسطیٰ وچ جاری جنگ دے اثرات نے پاکستان دے تھوڑے چر (قلیل مدت) دے معاشی نقشے نوں غیر یقینی بنا دتا اے۔ حالے ایہ واضح نئیں کہ معیشت دے حالات کیس پاسے جان گے، پر خدشہ اے کہ ایہ جنگ مہنگائی اُتے دباؤ پائے گی۔
بجٹ تے ادائیگیاں: رپورٹ مطابق خدشہ اے کہ جنگ معاشی ترقی تے ادائیگیاں دے توازن نوں متاثر کرے گی۔ جےچہ جنگ دے اثرات حالے گھٹ رہن دی توقع اے، پر ایہدے توں جڑے خطرے بہت زیادہ نیں۔
