بھارتی ارب پتی گوتم اڈانی دی فراڈ کیس مکاون لئی امریکی محکمہ انصاف نوں وڈی رقم دی پیشکش

امریکی محکمہ انصاف نے بھارتی ارب پتی گوتم اڈانی دے خلاف فراڈ دا کیس ختم کرن دی تیاری شروع کر دتی اے۔

امریکی اخبار “نیو یارک ٹائمز” نے ذرائع دے حوالے نال دسیا اے کہ کیس ختم کرن دا فیصلہ گوتم اڈانی دے وکیل دی پیشکش توں بعد کیتا گیا۔ اس پیشکش وچ اڈانی دے وکیل نے استغاثہ نوں کہیا کہ جے اوہ کیس واپس لے لین تاں اڈانی امریکہ وچ 10 ارب ڈالر دی سرمایہ کاری کرن تے 15 ہزار نوکریاں دین لئی تیار اے۔

استغاثہ دا کہنا اے کہ صرف سرمایہ کاری نال گوتم اڈانی دے خلاف فوجداری مقدمہ ختم نہیں ہو سکے گا، پر میٹنگ وچ موجود محکمہ انصاف دے اک سینئر افسر نے اڈانی دی اس پیشکش تے مثبت جواب دتا اے۔