بھارت تے یو اے ای دے وچکار دفاع، توانائی تے سرمایہ کاری دے معاہدیاں اُتے دستخط
بھارت تے متحدہ عرب امارات (یو اے ای) دے وچکار دفاع، توانائی تے سرمایہ کاری دے اہم معاہدیاں اُتے دستخط ہوئے نیں۔ ایہناں معاہدیاں اُتے دستخط بھارتی وزیراعظم نریندر مودی دے دورہ یو اے ای دے دوران کیتے گئے۔ ایس دورے وچ بھارت تے یو اے ای نے دفاعی پیداوار، توانائی تے سرمایہ کاری دے وڈے منصوبیاں اُتے اتفاق کیتا۔ بھارتی حکومت ولوں جاری کیتے گئے بیان وچ دسیا گیا اے کہ بھارت تے یو اے ای نے اسٹرٹیجک دفاعی تعاون تے تیل دے ذخیریاں نوں ورتن بارے معاہدے کیتے نیں۔ بھارت تے یو اے ای دے وچکار مائع پیٹرولیم گیس (LPG) دی فراہمی اُتے وی گل پکی ہو گئی اے۔ بیان وچ مزید دسیا گیا اے کہ بھارتی انفرا اسٹرکچر، آربی ایل بینک تے سمن کیپیٹل وچ یو اے ای ولوں 5 ارب ڈالر دی بھاری سرمایہ کاری کیتی جائے گی۔
