ورھیاں توں میوزیم وچ کھڑی گڈی نوں بغیر ہلے جلے ٹریفک جرمانے دا ٹکٹ مل گیا
امریکا وچ اک ایسا معمہ سامنے آیا اے جس نے کئی بندیاں دے ذہن گھما کے رکھ دتے نیں۔ یعنی اوہ کیہڑا بندہ سی جس نے نیویارک وچ اک کالے رنگ دی گڈی چلاندے ہوئے قانون توڑیا تے فیر جرمانہ وی نہیں بھریا۔ پر ایس توں وی زیادہ حیران کن گل ایہہ اے کہ ایہہ گڈی 1980 دی دہائی دی مشہور ٹی وی سیریز “نائٹ رائیڈر” دی نقل اے تے اوہ ورھیاں توں اک میوزیم وچ کھڑی اے۔
جی ہاں! واقعی شکاگو دے نیڑے واقع “وولو میوزیم” دی انتظامیہ نوں عجیب مشکل دا سامنا اے، جتھے نائٹ رائیڈر دی نقل کھڑی اے۔ پر اسے گڈی دی لائسنس پلیٹ والی اک گڈی اُتے نیویارک وچ قانون توڑن اُتے جرمانہ لایا گیا اے۔ میوزیم وچ کھڑی گڈی ورھیاں توں اپنی تھاں توں ہلی نہیں، پر حال ای وچ اوہنوں 50 ڈالر جرمانے دا ٹریفک ٹکٹ ملیا اے۔
جرمانے دی وجہ ایہہ سی کہ ایس نمبر دی گڈی 22 اپریل نوں اک سڑک اُتے بڑی تیزی نال دوڑ رہی سی۔ ایس ٹکٹ دے نال ٹریفک کیمرے دی تصویر وی اے جس وچ کالے رنگ دی گڈی دکھائی گئی اے جیہڑی بالکل میوزیم والی گڈی ورگی لگدی اے۔ ایس لائسنس پلیٹ والی گڈی نے 2024 دے آخر وچ وی 5 وار ٹریفک قوانین توڑے سن۔ اجے تیکر ایہہ صاف نہیں ہو سکیا کہ میوزیم دی گڈی دا نمبر نیویارک دی کسے گڈی نوں کویں مل گیا۔
میوزیم انتظامیہ دا کہنا اے کہ اک ٹی وی گڈی دی نقل پاروں سانوں جیہڑی قانونی مشکل پئی اے اوہ کافی دلچسپ اے، سانوں کوئی پتا نہیں کہ شکاگو وچ کھڑی گڈی نیویارک وچ کویں قانون توڑ رہی اے، اسیں ایہہ جانن دی کوشش کر رہے آں۔ اوہناں آکھیا کہ ایہہ واقعی حیران کرن والی گل اے کہ نائٹ رائیڈر چلان والا بندہ کون اے، اسیں بس ایہہ ویکھنا چاہندے آں کہ کیہ واقعی کسے نے شوقیہ طور تے ایہہ گڈی تیار کیتی اے، کیونکہ بظاہر ایہہ بڑی کمال دی نقل لگدی اے۔
