دوغلی پالیسی بحری جہازاں دی تباہی بھارت دا مقدر، مودی سرکار چپ
آبنائے ہرمز دے نیڑے اک ہور بھارتی بحری جہاز تباہ ہون توں بعد شکست خوردہ مودی حکومت مکمل خاموش اے؛ عالمی پدھر اُتے بے وقعت بھارت اپنے بحری جہازاں نوں تباہی توں بچاؤن وچ مکمل ناکام ہو گیا اے۔
عالمی جریدے “رائٹرز” مطابق متحدہ عرب امارات جان والا بھارت دا بحری جہاز حملے وچ تباہ ہون توں بعد سمندر وچ ڈب گیا اے۔ بھارت ایس تباہی توں بعد نہ تے کوئی واضح قدم چُک سکیا اے تے نہ ای ایہہ دس سکیا اے کہ ایس حملے دے پِچھے کون سی۔ رائٹرز نے اپنی رپورٹ وچ دسیا کہ بھارتی وزارتِ خارجہ “حاجی علی” نامی جہاز دی تباہی توں بعد صرف مذمت کرن تیکر محدود رہی اے۔ امریکہ تے ایران دی کشیدگی توں بعد آبنائے ہرمز وچ ہن تیکر بھارت دے جھنڈے والے دو ہور جہازاں اُتے وی حملے ہو چکے نیں۔
دوجے پاسے بھارتی سینئر تجزیہ کار سوشانت سنگھ نے مودی سرکار اُتے تگڑی تنقید کردے ہوئے آکھیا اے کہ نام نہاد مضبوط بھارتی قیادت جہازاں اُتے حملے روکن وچ فیل ہو چکی اے تے صرف گلاں نال کم چلا رہی اے۔ ماہرین مطابق، جہازاں دی تباہی اُتے مجرمانہ خاموشی پاروں مودی نوں بھارت دے اندروں وی سخت تنقید دا سامنا اے۔ مودی دور وچ عالمی سطح اُتے بار بار ہون والی بے عزتی دے باوجود “گودی میڈیا” ہجے وی “وشو گرو” دا راگ الاپن وچ مصروف اے۔ دوغلی پالیسی تے منافقانہ رویے پاروں بحری جہازاں دی تباہی ہن بھارت دا مقدر بن گئی اے۔
