برطانیہ وچ 106 سال پرانا تریخی رولر کوسٹر مستقل بند کرن دیاں تیاریاں۔
برطانیہ وچ موجود دنیا دے قدیم ترین رولر کوسٹرز وچ شمار ہون والے ’’سینک ریلوے‘‘ نوں 106 سال بعد مستقل طور تے بند کرن دیاں تیاریاں شروع کر دتیاں گئیاں نیں۔
ڈریم لینڈ مارگیٹ دی انتظامیہ نے اعلان کیتا اے کہ تفریحی پارک دی تریخی تے سب توں نمایاں سواری ’’سینک ریلوے‘‘ ہن ریٹائرمنٹ ول ودھ رہی اے۔ گریڈ ٹو وچ شامل ایہہ لکڑی دا رولر کوسٹر 1920 وچ نیویارک دے مشہور کونی آئی لینڈ دی طرز تے تعمیر کیتا گیا سی۔
پارک انتظامیہ دے مطابق اس دور وچ ایہنوں یورپ دے سب توں وڈے رولر کوسٹر دے طور تے پیش کیتا گیا سی تے افتتاحی سیزن دے دوران لگ بھگ 10 لکھ لوکاں نے ایس سواری دا چسکا لیا (لطف اٹھایا)۔
اک صدی توں ودھ چر فعال رہن توں بعد ہن پارک نے پکا (تصدیق) کیتا اے کہ ’’سینک ریلوے‘‘ نوں مستقل طور تے بند کر دتا جاوے گا۔ انتظامیہ دے مطابق 2024 وچ اک وڈی تکنیکی خرابی ساہمنیاں آون توں بعدوں ایہہ سواری آپریشنل نہیں سی۔
ڈریم لینڈ دے ترجمان دا کہنا اے کہ سواری نوں بند کرن دا فیصلہ لمے مشاورتی عمل توں بعد کیتا گیا۔
رپورٹاں دے مطابق ایس تریخی رولر کوسٹر نوں 1949 تے 1957 وچ اگ لگن (آتشزدگی) دے واقعیاں پاروں نقصان اپڑیا سی جدکہ 2006 توں 2015 دے دوران وی اگ لگن دے اک حملے توں بعد بحالی دے کم پاروں ایہنوں بند رکھیا گیا سی۔
