بھارتی عدالت نے مدھیہ پردیش دی تاریخی مسیت نوں مندر قرار دے دتا
بھارتی عدالت نے مدھیہ پردیش دی تاریخی کمال مولا مسجد نوں مندر قرار دے دتا
بھارتی عدالت نے مدھیہ پردیش وچ تاریخی کمال مولا مسجد نوں مندر قرار دے دتا اے۔
میڈیا رپورٹ دے مطابق بھارتی ریاست مدھیہ پردیش دی ہائیکورٹ نے تاریخی کمال مولا مسجد نوں ہندو دیوی ’واگ دیوی‘ دا مندر قرار دیندے ہوئے ہندوواں نوں اوتھے پوجا پاٹھ دی اجازت دے دتی اے، جڈوں کہ مسلم فریق دی درخواست نوں رد کر دتا اے۔
رپورٹ دے مطابق دھار شہر وچ موجود اے تاریخی تھاں جیہنوں “بھوج شالا کمپلیکس” وی آکھیا جاندا اے، کئی دہاکیاں توں رولے (تنازعے) دا شکار اے۔ مسلم برادری ایتھے جمعے دی نماز پڑھدی آ رہی سی، جڈوں کہ 2003 دے اک سمجھوتے دے تحت ہندوواں نوں ایتھے منگل دے دن پوجا دی اجازت دتی گئی سی۔
عدالت نے اپنے فیصلے وچ آثارِ قدیمہ سروے آف انڈیا (ASI) دی رپورٹ تے تکیہ کیتا اے، جیہدے وچ دعویٰ کیتا گیا سی کہ مسجد توں پہلاں ایتھے ہندو مندر موجود سی۔ عدالت نے مسلم فریق نوں متبادل (دوسری) جگہ زمین لین دا حکم دتا اے تاکہ تاریخی مسجد دی تھاں نویں مسجد بنائی جا سکے۔
عرب میڈیا دے مطابق فیصلے توں بعد اتوار نوں بھوج شالا کمپلیکس وچ زعفرانی جھنڈے لہرائے گئے تے ہندو تنظیماں نے دیوی دی عارضی مورتی رکھ کے مذہبی رسومات پوریاں کیتیاں، اس دوران علاقے وچ سخت سکیورٹی لائی گئی سی۔
رپورٹ وچ دسیا گیا اے کہ مسلم فریق دے وکلا نے فیصلے نوں ’قانون تے تاریخ دے خلاف‘ قرار دیندے ہوئے سپریم کورٹ وچ اپیل دائر کرن دا اعلان کیتا اے۔ رپورٹ دے مطابق 1935 دے برطانوی دور دے سرکاری نوٹس وچ صاف لکھیا ہویا سی کہ اے مسجد اے تے اگے وی مسجد ہی رہے گی، پر مدھیہ پردیش دی ہائیکورٹ نے اس پرانے نوٹیفکیشن نوں موجودہ قوانین توں پہلاں دا کہہ کے منن توں انکار کر دتا۔
دوسرے پاسے بھارتی ایم پی (رکن پارلیمنٹ) اسد الدین اویسی نے اس بارے اپنے بیان وچ آکھیا اے کہ اے فیصلہ بابری مسجد کیس توں بعد اک نویں مثال بن گیا اے، جیہدے نال پورے ملک وچ ہور مسجداں دے خلاف وی دعوے ساہمنے آ سکدے نے۔ اوہناں آکھیا کہ “اے سلسلہ آخر کتھے جا کے رکے گا؟ یقیناً صرف کمال مولا مسجد تے نہیں، بابری تے کمال مولا مسجد کیس دے فیصلے ثبوتاں یا انصاف تے نہیں بلکہ عوامی عقیدے (آستھا) تے ہوئے نے۔”
دوسری طرف ہندو تنظیماں نے اس فیصلے نوں ’ہندو تہذیب دی فتح‘ قرار دیندے ہوئے آکھیا اے کہ بابری مسجد توں بعد ہندو قوم پرستی نوں ہور شہہ ملی اے۔
