کینیا: پٹرول مہنگا کرن دے خلاف پرتشدد مظاہرے، 4 بندے ہلاک، 30 زخمی
کینیا وچ پٹرول دیاں قیمتاں ودھن دے خلاف مظاہرے: 4 بندے ہلاک، 30 زخمی تے 348 گرفتار
کینیا وچ ایندھن (پٹرول تے ڈیڈل) دیاں قیمتاں وچ حالیہ اضافے دے خلاف پورے ملک وچ ہون والے احتجاج دے دوران 4 بندے ہلاک تے گھٹو گھٹ 30 زخمی ہو گئے نیں۔ ایہہ ہڑتال حکام ولوں پٹرولیم دیاں قیمتاں وچ 20 فیصد تک دا ریکارڈ اضافہ کرن دے خلاف کیتی گئی۔
وزیر داخلہ کِپچومبا مرکو مین دے مطابق، پرتشدد احتجاج دے الزام وچ 348 بندیاں نوں گرفتار کیتا گیا اے۔ احتجاج دے دوران مظاہرین نے سڑکاں بند کیتیاں تے ٹائر وی ساڑے۔
دارالحکومت نیروبی دے وکھو وکھ حصیاں تے ملک دے دوجے علاقیاں وچ پولیس نے اوہناں مظاہرین نوں تتر بتر کرن لئی آنسو گیس دا استعمال کیتا جنہاں نے سڑکاں تے بلدے ہوئے ٹائر تے رکاوٹاں کھڑیاں کر کے راستے بند کیتے ہوئے سن۔
ٹرانسپورٹراں ولوں ملک گیر ہڑتال تے احتجاج دی کال توں بعد ہزاراں مسافر پھس کے رہ گئے، جدکہ دارالحکومت نیروبی وچ وڈیاں سڑکاں زیادہ تر خانی رہیاں، کاروبار ٹھپ ہو کے رہ گیا تے سکولاں نے وی دوجے طالبعلماں نوں آن لائن کلاسز لین دیاں ہدایتاں جاریں کیتیاں۔
یاد رہے کہ کینیا، باقی کئی افریقی ملکاں وانگوں، خلیجی ملکاں توں پٹرول منگوان تے بہت زیادہ انحصار کردا اے، تے 28 فروری توں شروع ہون والے امریکہ-اسرائیل تے ایران دے جمیلے (تنازعے) دی وجہ توں ایس ملک نوں ایندھن دی سپلائی وچ وڈی رکاوٹ دا سامنا کرنا پیا اے۔
