مودی دنیا دے آزاد میڈیا دا سامنا کیوں نہیں کردے؟ ناروے وچ خاتون صحافی نے بھارتی وزیر اعظم نوں شیشہ وکھا دتا
مودی سوالاں توں نس گئے، لفٹ دا بوہا بند ہو گیا؛ ناروے دی خاتون صحافی ہیلی لنگ دا مودی حکومت نوں تکھا جواب
اوسلو: ناروے وچ اک خاتون صحافی نے دنیا دے آزاد میڈیا دے سوالاں دا سامنا نہ کرن تے بھارتی وزیر اعظم نریندر مودی نوں بھرے مجمعے وچ شیشہ وکھا دتا اے۔
اوسلو وچ ناروے دے وزیر اعظم نال سانجھی بریفنگ توں بعد، بھارتی وزیر اعظم مودی صحافی دے سوال نوں ان دیکہا کر کے (نظر انداز کر کے) ٹُر گئے۔ خاتون صحافی ہیلی لنگ (Helle Lyng) نے اک واری پھر مودی تے سوال داغیا، پر اودوں تک لفٹ دا بوہا بند ہو چکیا سی۔
بھارتی وزارتِ خارجہ دی پریس بریفنگ دے دوران وی صحافی تے بھارتی حکام وچکار بنیادی حقاں تے میڈیا دی آزادی دے معاملے تے تیکھی نوک جھوک ہوئی۔ صحافی نے سوال کیتا کہ:
“جدوں بھارت وچ بنیادی حقاں دی خلاف ورزی ہو رہی اے، تاں ناروے بھارت تے کیویں اعتبار کرے؟ وزیر اعظم مودی آزادانہ سوالاں دے جواب کدی دیوݨ گے؟”
بھارتی ترجمان نے جواب دیوݨ دی بجائے ‘اگلا سوال’ کہہ کے دوجے صحافی ول منہ کر لیا، جس تے جواب نہ مِلݨ پاروں خاتون صحافی غصے وچ ہال توں باہر چلی گئیاں۔
بعد وچ، خاتون صحافی ہیلی لنگ نے ‘ایکس’ (Twitter) تے پوسٹ کردیاں آکھیا کہ:
“بھارتی وزیر اعظم نریندر مودی نے میرا سوال لیݨ توں ناں کر دتی، تے میں ایس توں ہور امید وی نہیں رکھدی سی۔”
خاتون صحافی نے ہور آکھیا کہ ‘ورلڈ پریس فریڈم انڈیکس’ (صحافتی آزادی دی لسٹ) وچ ناروے پہلے نمبر تے اے، جدکہ بھارت ۱۵۷ویں نمبر تے تِھڑک چکیا اے، جِتھے اوہ فلسطین، متحدہ عرب امارات تے کیوبا ورگے ملکاں نال کھلوتا اے۔ اوہناں دا کہنا سی کہ جنہاں طاقتاں نال اسیں سانجھ یا تعاون کردے آں، اوہناں توں سوال کرنا ساڈا فرض اے۔
