غزہ وچ اسرائیلی حملے جاری، شہداء تے زخمیاں دی گنتی وچ لگاتار وادھا
غزہ وچ اسرائیلی فورسز دیاں کاروائیاں تے بمباری دا سلسلہ بدستور جاری اے، جس پاروں انسانی بحران ہور سنگین ہوندا جا رہا اے۔
غزہ دی وزارت صحت دے مطابق لگاتار حملیاں دے نتیجے وچ ہسپتالاں تے امدادی نظام اُتے شدید دباؤ ودھ گیا اے جدکہ طبی سہولتاں پہلے ہی محدود وسائل دے نال کم کر رہیاں نیں۔
وزارت صحت دے مطابق پچھلے 24 گھنٹیاں دے دوران ہسپتالاں وچ اک فلسطینی شہید تے 16 زخمیاں نوں منتقل کیتا گیا، حکام دا کہنا اے کہ نام نہاد جنگ بندی دے باوجود اسرائیلی حملے مکمل طور اُتے نہیں رکے تے وکھو وکھ علاقیاں وچ کاروائیاں تقریباً روزانہ دی بنیاد اُتے جاری نیں۔
غزہ وزارت صحت دے مطابق جنگ بندی توں بعد اسرائیلی حملیاں وچ ہور 881 فلسطینی شہید جدکہ 2 ہزار 621 افراد زخمی ہو چکے نیں۔
وزارت صحت دا کہنا اے کہ 7 اکتوبر 2023 توں جاری اسرائیلی کاروائیاں دے آغاز توں لے کے ہن تک شہداء دی مجموعی گنتی 72 ہزار 773 تک اپڑ چکی اے جدکہ زخمیاں دی گنتی 1 لاکھ 72 ہزار 723 ہو گئی اے۔
فلسطینی حکام نے اسرائیلی کاروائیاں نوں منظم نسل کشی قرار دیندیاں ہویاں عالمی برادری توں فوری مداخلت تے شہریاں دے تحفظ لئی مؤثر قدماں دا مطالبہ کیتا اے۔
