ایلون مسک دنیا دے پہلے کھرب پتی بنن دے نیڑے
دنیا دے سب توں امیر بندے ایلون مسک بہت چھیتی دنیا دے پہلے ٹریلین ائیر (کھرب پتی) بنن دے نیڑے نیں۔
ایہہ اودوں ممکن ہو سکے گا جدوں ایلون مسک دی کمپنی ‘اسپیس ایکس’ (SpaceX) عوام دے سامنے 1750 ارب ڈالرز دی مارکیٹ ویلیو دے نال جائے گی۔ ایس کمپنی وچ ایلون مسک دا حصہ کافی زیادہ اے تے جے سچ مچ ایہدے شیئرز دی فروخت 1750 ارب ڈالرز دی مارکیٹ ویلیو نال ہوئی، تاں ایلون مسک بہت ہی زیادہ امیر ہو جان گے۔
ایلون مسک ولوں امریکی اسٹاک مارکیٹ وچ اسپیس ایکس دے شیئرز نوں ویچن لئی پیش کرن دا پلان بنایا گیا اے، جیہدے نال اوہ دنیا دے پہلے ٹریلین ائیر یا اک ہزار ارب ڈالرز دے مالک بندے بن سکدے نیں۔ اسپیس ایکس ولوں جون 2026 دے اَدھ (وسط) وچ ابتدائی پبلک آفرنگ یا آئی پی او (IPO) دا منصوبہ تیار کیتا گیا اے۔
آئی پی او دیاں ددستاویزاں (کاغذات) دے مطابق، کمپنی دا مقصد لوکاں نوں چاند تے مریخ اُتے پہنچان لئی سرمایہ اکٹھا کرنا اے، کیونکہ زمین اُتے انسانیت دی بقا نوں خطرہ اے۔ دستاویزاں وچ آکھیا گیا کہ “اسیں نہیں چاہندے کہ انساناں دی قسمت وی ڈائنا سور ورگی ہووے۔”
ایہناں کاغذات وچ ایہہ تے نہیں دَسیا گیا کہ اسپیس ایکس کنا سرمایہ اکٹھا کرنا چاہندی اے، پر ایہوجہے وڈے منصوبیاں لئی ارباں ڈالرز چاہیدے ہوندے نیں تے کجھ رپورٹس دے مطابق ایلون مسک 75 ارب ڈالرز دی سرمایہ کاری اکٹھی کرنا چاہندے نیں۔
اسپیس ایکس اوہ کمپنی اے جیہنے کامیابی نال دنیا دا پہلا بار بار استعمال ہون والا راکٹ تیار کیتا تے ‘اسٹار لنک’ دے ناں توں وڈا سیٹلائیٹ نیٹ ورک بنایا۔ ویسے تے ٹیسلا (Tesla) نے وی ایلون مسک لئی اک ہزار ارب ڈالرز دے معاوضے دے پیکج دی منظوری دتی اے، پر ایہدا دارومدار ٹارگٹس (اہداف) پورا کرن اُتے ہوئے گا۔ ایلون مسک اسپیس ایکس دے 42 فیصد شیئرز دے مالک نیں۔
ہن ایلون مسک ٹیسلا توں ٹریلین ائیر بنن یا اسپیس ایکس توں، اوہناں نوں وڈے چیلنجاں دا سامنا کرنا پئے گا۔ ٹیسلا توں معاوضہ لین لئی اوہناں نوں خاص ٹارگٹس پورے کرنے پین گے، جیویں کمپنی دی مارکیٹ ویلیو نوں 8500 ارب ڈالرز تک پہنچانا، جیہڑی کہ اجکل 1500 ارب ڈالرز اے۔ دوجے پاسے اسپیس ایکس دے شیئرز نوں 1750 ارب ڈالرز دی مارکیٹ ویلیو نال پیش کرنا وی اک وڈا چیلنج ہوئے گا کیونکہ اوہدے توں بعد کمپنی دی کماؤ (آمدنی) وچ بہت وڈا اضافہ کرنا پئے گا۔
