موٹروے گینگ ریپ کیس: ایلون مسک دی پاکستان دے عدالتی فیصلے دی کھل کے تعریف

دنیا دی سبھ توں امیر شخصیت ایلون مسک نے پاکستان دے عدالتی فیصلے دی کھل کے تعریف کردیاں ہویاں موٹروے گینگ ریپ کیس دے مجرماں دی سزائے موت برقرار رکھݨ دے لاہور ہائی کورٹ دے فیصلے دا خیر مقدم کیتا اے۔

لاہور ہائیکورٹ نے بدھ نوں موٹروے گینگ ریپ کیس دے مجرماں عابد ملہی تے شفقت بگا دی سزا دے خلاف اپیلاں خارج کر دتیاں سن۔

ایلون مسک نے موٹروے گینگ ریپ کیس وچ مجرماں دی سزائے موت دے فیصلے جی آیاں نوں آکھدیاں ہویاں آکھیا اے کہ مغرب (مغربی ملکاں) نوں وی پاکستان ورگے بہادرانہ فیصلے کرنے چاہیدے نیں۔

ایلون مسک نے ایہ گل برطانوی رکنِ پارلیمان روپرٹ جیمز گراہم (Rupert James Graham) دے سوشل میڈیا پیغام دے جواب وچ آکھی۔ روپرٹ جیمز نے عدلیہ دے فیصلے نوں پاکستان ولوں آؤݨ والی چنگی خبر قرار دتا سی۔ اوہ ‘ریسٹر برٹین’ (Restore Britain) نامی سیاسی پارٹی دے لیڈر وی نیں، اوہناں دی جماعت حکمرانی دے نظام تے لوکاں دا اعتماد بحال کرݨ تے مقامی سطح تے احتساب نوں ودھاؤݨ لئی کم کردی اے۔

چیتے رہے کہ 20 مارچ 2021 نوں انسدادِ دہشت گردی دی عدالت (ATC) نے موٹروے گینگ ریپ کیس دے مجرماں نوں زیادتی دے جرم وچ سزائے موت دا حکم دتا سی۔ دوہاں مجرماں نے 25 مارچ 2021 نوں لاہور ہائیکورٹ وچ ایس فیصلے نوں چیلنج کیتا سی۔