آخری رسومات دی تیاریاں دے دوران نیپالی کوہ پیما ماؤنٹ ایورسٹ توں 6 دن بعد زندہ مل گیا

کٹھمنڈو: نیپالی کوہ پیما داوا ماؤنٹ ایورسٹ توں 6 دن بعد زندہ مل گیا۔

غیر ملکی میڈیا دے مطابق داوا شرپا دے گھر والیاں (اہلخانہ) نے اوہنوں مریا ہویا سمجھ کے آخری رسومات دی تیاریاں شروع کر دتیاں سن پر جیہنوں اللہ رکھے اوہنوں کون چکھے، داوا 6 دیہاڑے (روز) تک ماؤنٹ ایورسٹ اتے لاپتہ رہݨ توں بعد زندہ مل گیا۔

داوا دا آکھݨ اے کہ برف نال ڈھکے پہاڑ اتے 6 دن برف چبا کے تے جیباں وچ پیاں چاکلیٹاں کھا کے گزارا کیتا، میں لاپتہ نہیں سی ہویا بلکہ آکسیجن سلنڈر خالی ہووݨ پاروں پچھے رُکݨ تے مجبور ہو گیا سی۔

میڈیا رپورٹاں دے مطابق داوا دا ایس ویلے کٹھمنڈو دے ہسپتال وچ ڈی ہائیڈریشن (پاݨی دی کمی)، فروسٹ بائیٹ (سردی نال جِلد دا سڑنا) تے ہک ٹٹی ہوئی ہڈی دا علاج چل رہا اے۔

چیتے رہے (خیال رہے) کہ ہر سال دنیا بھر توں سینکڑیاں دی گنتی وچ کوہ پیما دنیا دی سب توں اچی چوٹی ماؤنٹ ایورسٹ نوں سر کرن لئی نیپال دا رخ کردے نیں تے ایس مہم جوئی دے دوران کئی سیاح اپنی جان توں وی ہتھ دھو بہہندے نیں۔