مقبوضہ کشمیر دے معصوم بچے بھارتی ظلم و تشدد دا سبھ توں بڑا نشانہ
بی جے پی دی کٹھ پتلی مودی سرکار وچ مقبوضہ کشمیر دے معصوم بچے ریاستی دہشت گردی دا شکار نیں تے بھارتی ظلم و تشدد دا سبھ توں بڑا نشانہ بݨ رہے نیں۔
معروف خبر رساں ایجنسی کشمیر میڈیا سروس دے مطابق مقبوضہ جموں و کشمیر دے معصوم بچے بھارتی حکومت دے ظلم تے تشدد دا سبھ توں بڑا نشانہ بݨے ہوئے نیں، رپورٹ وچ آکھیا گیا اے کہ مودی حکومت دے دور وچ مقبوضہ کشمیر دے بچے بھارت دی ریاستی دہشت گردی دا شکار نیں تے پچھلیاں کئی دہائیاں توں جاری فوجی کارروائیاں دے اثرات کم سن بالاں اتے وی گہرے پئے نیں۔
کشمیر میڈیا سروس دے اعداد و شمار دے مطابق جنوری 1989 توں ہݨ تک بھارتی فوج دے ہتھوں شہید ہووݨ والے 96 ہزار 497 کشمیریوں وچ 933 بچے وی شامل نیں، بھارتی فوجی کارروائیاں دے نتیجے وچ ہک لاکھ 8 ہزار توں ودھ کشمیری بچے یتیم ہو چکے نیں، جِس پاروں ہزاروں ٹبر (خاندان) شدید متاثر ہوئے نیں۔
رپورٹ دے مطابق 2010 توں بعد بھارتی فوج دی ونڈوں (جانب سے) پیلٹ گناں تے آنسو گیس دے استعمال نال سیکڑاں کشمیری بچے بینائی توں محروم ہو گئے، متعدد کم عمر بچے بھارتی فوج دے مبینہ جعلی مقابلیاں وچ جان توں ہتھ دھو بیٹھے جڈوں کہ بہت سارے بچیاں نوں بھارتی کالے قانوݨاں دے تحت گرفتار کر کے جیلوں وچ بند کیتا گیا اے۔
آزادی پسند رہنماواں نے عالمی اداروں توں مطالبہ کیتا اے کہ مقبوضہ کشمیر وچ بھارتی فوج دے ظلم دا شکار کم سن بچیاں دے تحفظ لئی فوری اقدامات کیتے جاݨ، اوہناں دا آکھݨ اے کہ بچیاں دے بنیادی حقوق دے تحفظ نوں یقینی بݨاؤݨ لئی بین الاقوامی برادری نوں اپنا کردار ادا کرنا چاہیدا اے۔
اقوام متحدہ تے ایمنسٹی انٹرنیشنل ورگے عالمی ادارے وی کئی واری مقبوضہ کشمیر وچ بھارت دے مبینہ ظلم تے قتل عام توں متعلق رپورٹاں جاری کر چکے نیں۔
عالمی ماہرین دے مطابق مقبوضہ کشمیر وچ بچیاں اتے تشدد و ظلم مودی حکومت تے بھارتی فوج دی ہک سوچی سمجھی سازش اے، جِس دی وجہ توں عالمی قانوݨاں دے باوجود مقبوضہ کشمیر دے معصوم بچے بھارتی مظالم دی بھاری قیمت چکا رہے نیں۔
