امریکا وچ چھوٹا طیارہ ڈگ کے تباہ، شہریاں دی فوری امدادی کارروائی نے مسافراں دی جان بچا لئی
امریکی ریاست ٹیکساس دے شہر لاریڈو وچ اک چھوٹا جیٹ طیارہ ہائی وے تے ڈگ کے تباہ ہو گیا جیہدے نتیجے وچ اک بندہ ہلاک ہو گیا پر شہریاں دے ویلے سر (بروقت) ایکشن نے کئی مسافراں نوں بچا لیا۔
غیر ملکی خبر رساں ایجنسی دے مطابق طیارے وچ 6 بندے سوار سی، حادثے توں بعد ہائی وے تے سفر کرن والے لوک اپنیاں گڈیاں چھڈ کے زخمیاں نوں بچاؤن لئی نس پئے تے کاک پٹ دی باری (کھڑکی) بھن کے اندر پھسے لوکاں نوں کڈھن دی کوشش کیتی۔
خبر رساں ایجنسی دے مطابق ایہ واضع نہیں ہو سکیا کہ ہلاک ہون والا بندہ طیارے وچ سوار سی یا زمین تے موجود سی، جد کہ پولیس نے طیارے وچ سوار لوکاں دی پچھان (شناخت) تے اوہناں دی حالت بارے ہور تفصیلات نہیں دتیاں۔
امریکی میڈیا دے مطابق دھوئیں پاروں طبیعت خراب ہون تے 5 پولیس اہلکاراں نوں ہسپتال پہنچایا گیا۔
فلائٹ ٹریکنگ کمپنی دے مطابق حادثے دا شکار ہون والا طیارہ “سیسنا سائیٹیشن لیٹیٹیوڈ” سی، جیہڑا میکسیکو دے “لاس کابوس انٹرنیشنل ائیرپورٹ” توں روانہ ہویا سی۔
حادثے دی وجہ فوراً معلوم نہیں ہو سکی پر لاریڈو انٹرنیشنل ایئرپورٹ دے ڈائریکٹر گلبرٹو سانچیز دے مطابق طیارے نوں شاید (ممکنہ طور تے) کوئی فنی خرابی پیش آئی سی، پر اوہناں نے ایس حوالے نال ہور تفصیلات نہیں دتیاں۔
