اسلام آباد مفاہمتی یادداشت دے تحت امریکہ تے ایران چ تکنیکی سطح دے مذاکرات کل سوئٹزرلینڈ چ ہون گے۔
امریکہ تے ایران دے وچکار اسلام آباد مفاہمتی یادداشت دے تحت تکنیکی سطح دے مذاکرات 21 جون نوں سوئٹزرلینڈ چ ہون گے۔
ترجمان دفترِ خارجہ دے مطابق سوئٹزرلینڈ دے شہر برگن اسٹاک چ ہون والے مذاکرات چ امریکہ، ایران، پاکستان تے قطر دے نمائندے شریک ہون گے۔
ترجمان دفترِ خارجہ دے مطابق اسلام آباد مفاہمتی یادداشت تے دستخطاں توں بعد فالو اپ دے طور تے تکنیکی سطح دے مذاکرات کروائے جا رہے نیں۔
ترجمان دفترِ خارجہ دا کہنا اے کہ پاکستان ثالث (وچولے) دے طور تے مذاکراتی عمل نوں سہولت دیندا رہے گا، پاکستان دا مقصد اسلام آباد مفاہمتی یادداشت دے تحت طے پائے سمجھوتے نوں اگے ودھانا اے، پاکستان امن عمل چ ثالثی دے کردار نوں جاری رکھے گا۔
ایران نال مذاکرات لئی چیزاں ٹھیک جا رہیاں نیں: جے ڈی وینس
دوجے پاسے امریکہ دے نائب صدر جے ڈی وینس دا وی کہنا اے کہ ایران نال مذاکرات کل متوقع نیں، ایران نال مذاکرات لئی چیزاں ٹھیک جا رہیاں نیں، میرا شاید اگلے دو دناں چ سوئٹزرلینڈ جانا متوقع اے، وٹکوف تے کُشنر ایران نال مذاکرات لئی اوتھے موجود نیں۔
ایڈھر ایرانی وزارتِ خارجہ دے ترجمان اسماعیل بقائی دا کہنا اے کہ ایرانی مذاکراتی ٹیم کچھ دیر چ سوئٹزرلینڈ لئی روانہ ہو جائے گی، ایرانی وفد مفاہمتی یادداشت دی پیروی تے ایس تے عملدرآمد دا مطالبہ کرے گا۔
اسماعیل بقائی دا کہنا سی کہ اسیں اپنی ذمہ داریاں تے وعدیاں تے عمل کیتا اے، امریکہ پابند اے کہ اوہ اسرائیل نوں لبنان تے حملے بند کرن تے مجبور کرے، جے اگلے دھر (فریق) نے اپنے وعدیاں دی پاسداری نہ کیتی تاں سمجھوتہ خطرے چ پے جائے گا، اگلے دھر نوں چھیتی توں چھیتی ضروری اقدامات کرنے ہون گے، جے اگلے دھر نے اپنے وعدیاں دی پاسداری توں انکار کیتا تاں ایران جوابی کارروائی کرے گا۔
