بھارت تے متحدہ عرب امارات (یو اے ای) دے وچکار براہموس میزائل دی فروخت اُتے گل بات جاری اے: خبر ایجنسی
بھارت تے متحدہ عرب امارات (یو اے ای) دے وچکار براہموس سپرسانک کروز میزائلوں دی خریداری لئی گل بات جاری اے۔
غیر ملکی خبر رساں ایجنسی ‘رائٹرز’ نے ذرائع دا حوالہ دیندے ہوئے دَسیا اے کہ ایہہ مذاکرات ابھی شروعاتی مرحلے وچ نیں پر ایہہ تیزی نال اگے ودھ رہے نیں.
ذرائع دے مطابق متحدہ عرب امارات نے براہموس توں علاوہ بھارت دے فضائی دفاعی نظام ‘آکاشتیر’ وچ وی دلچسپی وکھائی اے۔
خبر رساں ایجنسی دے مطابق بھارتی حکام تے متحدہ عرب امارات دی وزارتِ خارجہ نے ایس معاملے اُتے تبصرے دی درخاستاں دا کوئی جواب نہیں دِتا۔
براہموس میزائل بھارت تے روس دا سانجھا منصوبہ اے تے ایہہ دنیا دے تیز ترین کروز میزائلاں وچ گنیا جاندا اے جیہنوں زمین، سمندر تے فضا توں داغیا جا سکدا اے۔ دوجے پاسے آکاشتیر اک مکمل خودکار فضائی دفاعی نظام اے جیہنوں بھارت دی سرکاری کمپنی ‘بھارت الیکٹرانکس لمیٹڈ’ تے بھارتی فوج نے تیار کیتا اے۔
خبر رساں ایجنسی دا کہنا اے کہ متحدہ عرب امارات نے مشرقِ وسطیٰ وچ جنگ دے دوران ایرانی حملیاں توں بعد اپنی دفاعی صلاحیت نوں ودھاؤن لئی اسلحہ خریدن دے منصوبے تیز کر دتے نیں، ایس توں علاوہ اوہنوں اپنی توانائی دی برآمدات لئی اہم لنگھگاہ ‘آبنائے ہرمز’ دا تحفظ وی چاہیدا اے۔
براہموس دی ممکنہ فروخت لئی بھارت نوں روس دی منظوری چاہیدی ہوئے گی کیونکہ ایہہ دوواں ملکاں دا سانجھا منصوبہ اے، پر ذرائع دے مطابق روس تے متحدہ عرب امارات دے قریبی تعلقات پاروں ایہہ کوئی وڈی رکاوٹ نہیں ہوئے گی۔
خبر رساں ایجنسی دے مطابق متحدہ عرب امارات کول پہلے ای امریکی ساختہ MGM-168 ATACMS بیلسٹک میزائل موجود نیں جنہاں دی زیادہ توں زیادہ رینج 300 کلومیٹر اے، جبکہ فضائی دفاع لئی اوہدی جیب وچ جدید تھاد (THAAD) سسٹم تے پیٹریاٹ سسٹم وی موجود نیں.
بھاویں بھارت دے اسلحہ برآمدات دے کئی معاہدے ماضی وچ پورے نہیں ہو سکے، پر ماہرین دے مطابق متحدہ عرب امارات تے دوجے خلیجی ملکاں نوں اسلحے دی ممکنہ فروخت دے امکانات موجود نیں.
