“بھارت وچ کنڈے کھڑے کرن والا واقعہ، ویاہ توں کج مہینے پہلاں کڑی نے اپنے منگیتر نوں قتل کر دتا”
“بھارت دی ریاست مہاراشٹر وچ دکھدائی واقعہ پیش آیا اے جتھے ویاہ توں کج مہینے پہلاں اک کڑی نے اپنے منگیتر نوں موت دے گھاٹ اتار دتا۔”
بھارتی میڈیا دی رپورٹ دے مطابق ریاست مہاراشٹرا وچ کیتن اگروال نامی اک منڈے دی ویاہ توں کج مہینے پہلاں موت ہو گئی، موت توں بعد اوہدی منگیتر سیا گوئل نے اپنے انسٹاگرام اکاؤنٹ اُتے اک جذباتی سٹوری شیئر کیتی جس وچ لکھیا سی کہ ’توں مینوں میری سالگرہ اُتے چھڈ گیا، واپس آ جا‘۔
شروع وچ کیتن اگروال دی موت نوں اک حادثہ ثابت کرن دی کوشش کیتی گئی پر بھارتی پولیس دی تفتیش دے دوران ایہہ گل سامنے آئی کہ 18 جون نوں سیا گوئل نے کیتن اگروال نوں اپنی سالگرہ دے موقعے اُتے لوہا گڑھ قلعے توں مبینہ طور اُتے دھکا دے کے ڈونگھی کھائی وچ گرا دتا سی۔
بھارتی میڈیا رپورٹ دے مطابق پولیس نے ایہہ انکشاف کیتا اے کہ سیا گوئل دا مبینہ طور اُتے چیتن چوہدری نامی بندے دے نال چکر (تعلق) سی، اس لئی ایہناں دوواں نے کیتن اگروال نوں راہ توں ہٹان لئی کئی ہفتے پہلاں ہی اوہنوں مارن دا منسوبہ بنا لیا سی۔
پولیس نے قتل کرن تے حادثے دا ڈرامہ رچان دے الزام وچ سیا تے چیتن نوں گرفتار کر کے پرچہ درج کر لیا اے تے اگلی تفتیش کیتی جا رہی اے۔
دوجے پاسے منڈے دے پیو وشال اگروال نے اپنے بیان وچ آکھیا کہ کیتن نوں اوہدی منگیتر دے افیئر بارے کج پتہ نہیں سی، پر اوہ اس گل توں پریشان رہندا سی کہ سیا گوئل دا فون گھنٹیاں بدھی مصروف رہندا سی۔
مقتول دے پیو دے مطابق سیا دے گھر والے یا اوہ خود ویاہ توں نانہہ وی کر سکدے سن، ساڈے پتر نوں مارن دی کیہ لوڑ سی۔
