یورپ وِچ شدید گرمی دی لہر برقرار، اسپین وِچ پچھلے 5 دِناں وِچ ہلاکتاں دی گنتی 325 توں ودھ ہو گئی
یورپ بھر وِچ شدید گرمی دی لہر برقرار اے، اسپین وِچ ریکارڈ گرمی پاروں پچھلے 5 دِناں وِچ ہلاکتاں دی گنتی سوا تن سو توں ودھ ہو گئی، جرمنی وِچ گرمی دا 6 سالہ ریکارڈ ٹٹ گیا تے درجہ حرارت 41 ڈگری توں وی ودھ گیا۔
فرانس، جرمنی تے اٹلی سمیت کئی یورپی ملکاں نے سیاحتی تھان٘واں بند کر دتے نیں، بجلی دی منگ ودھن پاروں کئی علاقیاں وِچ پاور بریک ڈاؤن دا ساہمنا اے، ریلوے سروسز وی متاثر ہوئیاں نیں۔
جرمنی دے مغربی شہر زاربرکن وِچ 41.3 ڈگری سینٹی گریڈ درجہ حرارت ریکارڈ کیتا گیا جہڑا ملک دی تاریخ دا سب توں زیادہ درجہ حرارت اے۔
ایسے دوران برطانیہ تے سوئٹزرلینڈ وِچ وی جون دے مہینے دا ہُن تیکر دا سب توں زیادہ درجہ حرارت ریکارڈ کیتا گیا۔ انگلینڈ دے پنڈ سینٹن ڈاؤنہم وِچ درجہ حرارت 37.3 ڈگری سینٹی گریڈ جدوں کہ سوئٹزرلینڈ دے شہر بازل وِچ 38.8 ڈگری سینٹی گریڈ ریکارڈ کیتا گیا۔
فرانس دی ہیٹ ویو الپس دے پہاڑاں تیکر پہنچ گئی اے، 4 ہزار 800 میٹر بلند برف نال کجّی پہاڑی چوٹی ‘Mont Blanc’ سر کرن والے کوہ پیماواں تے گائیڈاں نوں وی گرمی دا احساس ہو رہا اے، شدید گرمی پاروں نرم برف نے رستے ہور خطرناک بنا دتے نیں تے کوہ پیما رستے بدلن تے مجبور نیں۔ کوہ پیماواں دا کہنا اے کہ پہاڑاں تے برف نرم تے اوہدے وِچ چوڑیاں دَراڑاں حالات نوں اوکھا تے خطرناک بنا رہیاں نیں۔
ڈنمارک وِچ اَج پچھلے ڈیڑھ سو سال توں ودھ چر دا سب توں زیادہ درجہ حرارت ریکارڈ کیتا گیا، جہاں پارہ 36.6 ڈگری سینٹی گریڈ تیکر پہنچ گیا۔ ایہدے نال ہی 36.4 ڈگری سینٹی گریڈ دا پرانا ریکارڈ وی ٹٹ گیا جہڑا 1975 توں برقرار سی۔
اٹلی دا سب توں لما دریا سُکن لگیا، شدید سوکے دا ڈر
اٹلی وِچ سب توں لما دریا سُکن لگیا اے تے کساناں نوں شدید سوکے (خشک سالی) دا ڈر اے۔
شدید گرمی دی لہر پاروں اٹلی دے سب توں لمے دریا ‘پو’ (PO) وِچ پانی تیزی نال گھٹ ہو رہا اے، جیہدے نتیجے وِچ سمندر دا کھارا پانی دریا وِچ وڑن لگیا اے تے شمالی اٹلی وِچ جولائی کے دوران شدید سوکے دے خطرے ودھ گئے نیں۔
ماہرینِ موسمیات دے مطابق مغربی یورپ توں اگے ودھن والی ایہ گرمی دی لہر ہُن بلقان دے ملکاں وِچ وی انتہائی زیادہ درجہ حرارت لے کے آئے گی۔ سربیا، بوسنیا، کروشیا، کوسوو، شمالی مقدونیہ تے مونٹی نیگرو دے کچھ علاقیاں وِچ درجہ حرارت 39 ڈگری سینٹی گریڈ تیکر پہنچن دی پیشگوئی کیتی گئی اے۔
شدید گرمی توں بعد انگلینڈ، اسکاٹ لینڈ تے شمالی آئرلینڈ دے وکھو وکھ حصیاں وِچ طوفان دی وارننگ جاری کیتی گئی اے۔ پچھلے 24 گھنٹیاں دے دوران 63 ہزار توں ودھ واری آسمانی بجلی چمکی اے جیہدے پاروں 700 توں ودھ پروازاں لیٹ ہوئیاں۔
