گوگل نے اینڈرائی ڈیوائسز وچ کروم براؤزر نوں جیمنائی اے آئی فیچرز نال لیس کر دتا اے
گوگل ولوں اینڈرائیڈ ڈیوائسز وچ کروم ویب براؤزر لئی جیمنائی اے آئی فیچرز متعارف کران دا سلسلہ شروع کر دتا گیا اے۔
گوگل نے اک بلاگ پوسٹ وچ دسویا کہ سب توں پہلاں امریکہ وچ صارفین لئی اینڈرائیڈ ڈیوائسز وچ جیمنائی اے آئی فیچرز متعارف کرائے گئے نیں۔
ایہ فیچرز حالے تیکر کروم دے ڈیسک ٹاپ ورژن صارفین نوں دستیاب سن پر ہن موبائل ڈیوائسز لئی وی اوہناں نوں متعارف کرایا جا رہیا اے۔
ایس فیچرز دا مقصد موبائل براؤزر نوں متحرک ڈیجیٹل اسسٹنٹ وچ تبدیل کرنا اے۔
ایس وچوں اک فیچر ویب پیج دی اے آئی سمریز اتے ایس دے حوالے نال سِدھے سوال پُچھن دا اے۔
ایسے طرحاں گوگل ولوں کروم وچ جی میل، گوگل کیپ اتے کیلنڈر نوں شامل کیتا جا رہیا اے۔
کمپنی دے مطابق گوگل نانو بنانا ٹول وی صارفین نوں سِدھا کروم تے دستیاب ہوئے گا تاکہ اوہ تصویراں نوں تیار یا اوہناں نوں ایڈٹ کر سکن۔
ایس ٹول نال تُسیں نویں آرٹ ورک تیار کر سکو گے یا ویب پیج دے ٹیکسٹ نوں تصویراں وچ تبدیل کر سکو گے۔
اک ہور فیچر آٹو براؤز دا اے پر ایہ گوگل اے آئی پرو اتے الٹرا سبسکرائبرز نوں ہی دستیاب ہوئے گا۔
آٹو براؤز بنیادی طور تے اے آئی ایجنٹ سسٹم اے جیہڑا ویب تے پیچیدہ کم کر سکے گا۔
