ہسپتال اندر کوئی وی چیز عالمی معیار ورگی نہیں، سانحہ پمز دی مڈھلی جانچ پڑتال رپورٹ وزیراعظم اگے پیش کر دتی گئی اے۔

اسلام آباد: سانحہ پمز دی مڈھلی جانچ پڑتال رپورٹ وزیراعظم شہباز شریف نوں پیش کر دتی گئی اے۔
ذرائع مطابق انکوائری کمیٹی دے سربراہ سابق سیکرٹری داخلہ شاہد خان نے سانحہ پمز دی رپورٹ وزیراعظم نوں جمع کروائی، رپورٹ رات گئے وزیراعظم دے مشیر توقیر شاہ دے آفس وچ جمع کروائی گئی۔
ذرائع دا آکھݨ اے کہ توقیر شاہ نے رپورٹ وزیراعظم نوں بھیج دتی اے تے ایس دے مواد تے سفارشات توں وی جانو کرا دتا اے۔
انکوائری کمیٹی دے ذرائع نے رپورٹ وزیراعظم آفس بھیجن دی تصدیق کر دتی اے، تے رپورٹ پبلک کرن دا اختیار وزیراعظم نوں دے دتا گیا اے۔
ایہ وی پڑھو
سانحہ پمز: وزیراعظم نے انکوائری کمیٹی بنائی اے، قیاس آرائی دی بجائے رپورٹ دا انتظار کرنا چاہیدا اے، وزیر قانون
پمز ہسپتال واقعہ: وفاقی سیکرٹری صحت عہدے توں برطرف، وزیراعظم نے اعلیٰ پدھر دی انکوائری کمیٹی بنا دتی
ذرائع دا دسݨ اے کہ رپورٹ اُتے انکوائری کمیٹی دے سارے ممبراں دے دستخط نیں، کمیٹی نے سانحہ پمز دی وجوہات تے ذمےواراں دا تعین وی کر دتا اے۔
ذرائع مطابق رپورٹ وچ ریسکیو ٹیماں نوں امدادی کماں وچ پیش آؤن آلے مسائل دا ذکر وی موجود اے، پمز دا جیڑھا متعلقہ عملہ غیر حاضر سی انھاں دے خلاف کارروائی دی سفارش کیتی گئی اے، مستقبل وچ ایسے حادثات توں بچن لئی سفارشات وی دتیاں گئیاں نیں، پمز دی انتظامیہ تے ڈاکٹراں دے انٹرویو وی رپورٹ دا حصہ نیں جدوں کہ فائر بریگیڈ ریسکیو ٹیماں دے بیان وی رپورٹ وچ شامل نیں۔