پاکستان ہاکی ٹیم نے جنوبی افریقا نوں ہر کے ورلڈ کپ وچ 11 ویں پوزیشن حاصل کر لئی اے۔

چار واری دی عالمی چیمپئن پاکستان ہاکی ٹیم نے جنوبی افریقا نوں ہر کے ایف آئی ایچ ہاکی ورلڈ کپ وچ اپنے سفر دا انت 11 ویں پوزیشن اُتے کیتا اے۔
ایمسٹلوین وچ پاکستان تے جنوبی افریقا وچکار 11 ویں پوزیشن دا میچ کھیڈیا گیا، جنوبی افریقا نے پہلے کوارٹر وچ گول کرکے برتری لے لئی۔
دوجے کوارٹر وچ جنوبی افریقا نے اک ہور گول کرکے 0-2 دی برتری حاصل کر لئی۔
پر فیر پاکستان ٹیم نے کم بیک کیتا اتے تھلے اتے 2 گول کرکے برتری مکا دتی، پہلے افراز نے گول کیتا فیر محمد حماد نے گول کرکے مقابلہ برابر کر دتا۔
ہاف ٹائم تک مقابلہ 2-2 گول نال برابر رہیا۔
تیسرے کوارٹر دے شروع وچ ہی کپتان رانا وحید نے گول کرکے پاکستان نوں برتری دلا دتی۔ 8 منٹ مگروں جنوبی افریقا نے گول کرکے مقابلہ 3-3 گول نال برابر کر دتا۔
کھیڈ دے انت توں 5 منٹ پہلاں جنوبی افریقا نے پنالٹی اسٹروک اُتے گول کرکے فیر برتری حاصل کر لئی۔ میچ دے انت دے آخری سیکنڈ وچ حماد الدین نے گول کرکے مقابلہ 4-4 گول نال برابر کر دتا۔
میچ دا فیصلہ پنالٹی شوٹ آؤٹ اُتے ہویا جیدے اُتے پاکستان نے 3-4 نال جت حاصل کرکے ورلڈ کپ وچ اپنے سفر دا انت 11 ویں پوزیشن اُتے کیتا۔