بھارت وچ آکسیجن سلنڈر مفت دین لئی مسلمان نوجواناں دا وڈا قدم

اُترپردیش( پنجابی میڈیا گروپ) بھارت وچ مریضاں نوں مفت آکسیجن سلنڈر دین والے مسلمان نوجوان شاہنواز شیخ نے اپنی قیمتی کار تے زیور تک ویچ دتا۔
بھارتی میڈیا وچ جیتھے اج کل مودی سرکار دی ناقص کارکردگی اُتے کڑی تنقید ہورہی اے اوتھے ای اُتر پردیش دے علاقے اعظم گڑھ دے31سالہ مسلمان نوجوان دے چرچے ہورہے نیں۔ مقامی لوکاں نے وی مریضاں نوں مفت آکسیجن سلنڈرز دین لئی ہر ویلے مدد نوں تیار رہن اُتے شاہنواز شیخ نوں آکسیجن مین دا خطاب دتا اے۔
شاہنواز شیخ کورونا دی ابتدا وچ گھر دے نیڑے غریب بستی وچ راشن تقسیم کردے سن تے ایس دوران اوہناں دی دوست دی حاملہ بہن رکشے وچ اسپتال جان دے دوران آکسیجن گھٹ ہون دی وجہ نال ہلاک ہوگئی تے ایس واقعے نے دوناں دوستاں دی زندگی دا مقصد ہی بدل دتا تے دوناں نے مریضاں نوں آکیسجن سلنڈرمفت دین دا بیڑہ چُک لیا۔