خیبر پختونخوا حکومت دا کیہ علاج کراں، اوہ کیویں نظام چلا رہے نیں: چیف جسٹس

اسلام آباد: چیف جسٹس پاکستان گلزار احمد نے اک کیس دی سماعت وچ ریمارکس دتے کہ خیبر پختونخوا حکومت دا کیہ علاج کراں، اوہ کیویں نظام چلا رہے نیں۔ چیف جسٹس دی سربراہی وچ سپریم کورٹ دے تن رکنی بنچ نے سروس امور بارے خیبر پختونخوا حکومت دی درخواست دی سماعت کیتی۔

عدالت نے ڈآئریکٹر ایلمنٹری ایجوکیشن خیبر پختونخوا دی سروس امور وچ درخواستاں زائد المیعاد ہون تے خارج کر دتیاں۔

عدالت نے ایڈووکیٹ جنرل آفس نوں معاملے دی تحقیقات دا حکم دیندیاں آکھیا تاخیر دے ذمہ داران بندیاں دے خلاف کاروائی عمل وچ لیائی جاوے تے اوہناں توں رقم ریکور کیتی جاوے۔ عدالت نے تن مہینے وچ تحقیقات مکمل کرکے رجسٹرار آفس نوں آگاہ کرن دا حکم دتا۔جسٹس اعجاز الحسن آکھیا خیبر پختونخوا حکومت دی روش اے اوہاں دی اکثر درخواستاں زائد المیعاد ہوندیاں نیں، پنج پنج لکھ دے جرمانے صوبائی حکومت نوں ہو رہے نیں۔

چیف جسٹس پاکستان گلزار احمد نے ریمارکس دتے خیبر پختونخوا حکومت دا کیہ علاج کراں؟ کے پی والے کیویں حکومت دا نظام چلا رہے نیں، سارے افسران تے بابو دانستہ تاخیر کردے نیں، ایہ عمل جان بوجھ کے کیتا جاندا اے۔