نعت شریف

علی احمد گجراتی

یٰسین مزمل طٰہٰ دے قرآن قصیدے پڑھدا اے
کر حمد مدثر اطہر دی رحمٰن قصیدے پڑھدا اے
وحشت وچ گِھریاں ہویاں نوں تہذیب سکھائی آقاۖ نیں
اَج پا کے اپنے منصب نوں انسان قصیدے پڑھدا اے
رنگین فضاواں دے اندر پُر نُور نظارے کیتے نیں
گم ہو کے آپۖ دی ہستی وچ وِجدان قصیدے پڑھدا اے
اوہ ذات خدا دے مظہر ہِن لاریب صفات دا پیکر نیں
تعظیم کریندے عیسٰی وی لقمان قصیدے پڑھدا اے
اوہ عزت شان عطا ہویا جاروب کشی دا آقاۖ توں
دے دے جھاڑو دَر اطہر تے سلمان قصیدے پڑھدا اے
ہر شے تے رب نیں دُنیا تے بس آپ ۖ دی اُلفت بھیجی اے
ہَر ذرّہ ذرّہ آقاۖ دے ہر آن قصیدے پڑھدا اے
کیہ مان کریں تُوں لفظاں تے ہے احمد کیہ اوقات تیری
پڑھ آپۖ درود محمدۖ تے یزدان قصیدے پڑھدا اے