چیتر رنگ

افضل ساحر

چیتر رنگ نروئے وے لوکا!
چیتر رنگ نروئے
بھوئیں تے نِویں حیاتی کھِڑ پئی
اسیں موئے دے موئے
وے لوکا! چیتر رنگ نروئے
پھْلاں تْوں نہ اَکھ چْکِیوے
چیت مِلا پی رْتّے
باہر سْلکھّنا دِن چڑھ آیا
اسیں آں سْتّم سْتّے
پْٹھے ویکھ وطیرے ساڈے
ہاسے، پِٹّ کھلوئے
چیتر رنگ نروئے وے لوکا!
چیتر رنگ نروئے
لگے بْور تے پھْٹِیاں لگراں
رْکھّاں رنگ وٹائے
اسیں نہ اپنے جْسّیاں اْتّوں
ہنڈھے ورتے لاہے
کْھوہ تے کھڑھ کے وی نہ بھریا
بھانڈا لوئے لوئے
چیتر رنگ نروئے وے لوکا!
چیتر رنگ نروئے
جو نہ چیتر رْتّے کھِڑیا
اْس کیہ ساون ہنڈھاؤنا
جِس نہ رنگ پچھانے اْسدا
کیہ لاہونا، کیہ پاؤنا
سْوہا، نِیل، بسنّتی، ساوا
مانے کوئے کوئے
چیتر رنگ نروئے وے لوکا!
چیتر رنگ نروئے
کد سِپّیاں دے مْوہیں ڈِگنا
ایہہ نہ پْچھّیں اڑیا
اْس دِن تینوں چانن ہونا ایں
جِس دِن چانن لڑیا
جو وی اپنی ہوند سیہانے
رنگ ہنڈھاوے سوئے! وے لوکا
چیتر رنگ نروئے وے لوکا!
چیتر رنگ نروئے
بھوئیں تے نویں حیاتی کھِڑ پئی
اسیں موئے دے موئے
کریئے! چیتر رنگ نروئے