غزل

قیصر محمود گورایہ

ماں بولی نوں غزل دا پھُل پھڑایا یارو
’’ویلن ٹائن ڈے‘‘ میں انج منایا یارو
اُنج تے خورے اوہ تے میں لگ جاندے نیڑے
ساڈے وچ پر پینداے انکھ دا وایا یارو
آپے پھول کے گھر نمانیاں چڑیاں دے فیر
آپے روندو کانواں رولا پایا یارو
مکھ دے بھولے مار کے سینے سٹ ہجر دی
پہاڑ دا جِگرا مٹی وچ رلایا یارو
چڑھدے چیتر سجناں باجھوں سجرے چاء نوں
اَوڑ ہجر دی ویکھو سُکنے پایا یارو
وچھڑے یار دا دِتا دُکھ پراگا اج تک
قیصرؔ لا کے سینے نال ہنڈھایا یارو