چیئرمین سینیٹ دے نال چینی سفیر دی ملاقات ،سی پیک تے دوستانہ تعلقات تے وچار

اسلام آباد (بیورو رپورٹ) چیئرمین سینیٹ محمد صادق سنجرانی نے آکھیااے کہ پاکستان چین دے نال اپنی لازوال تے دیرینہ دوستی اتے فخر کردا اے۔ پارلیمانی وفود دے تبادلیاں دے نال باہمی سیاسی، سماجی تے معاشی تعلقات وچ مزید اضافہ ہویا اے۔ ایہناں خیالات دا اظہار اوہناں نے پاکستان وچ چین دے سفیر نونگ رونگ دے نال گل بات دے دوران کیتا۔ جنہاں نے ا یہناں دے نال ملاقات کیتی۔ دوران ملاقات درطرفہ تعلقات تے باہمی دلچسپی دے امور اتے وچار کیتا گیا۔ چیئرمین سینیٹ نے آکھیا کہ دوواں ملکاں دے دوستانہ تعلقات خطے دی معاشی تے سماجی ترقی دی نئی سمت متعین کر رہے نیں۔ اوہناں نے آکھیاکہ پاکستان چین دے نال اپنی زوال تے دیرینہ دوستی اتے فخر کردا اے۔ اوہناں نے آکھیا اے کہ دوواں ملکاں دے وچکار ادارہ جاتی معاونت نوں مزید فروغ دین دی لوڑ اے۔ چین دے سفیر نونگ رونگ نے مشترکہ ترقی تے مربوط روابط دے نال متعلق چیئرمین سینیٹ دے خیالات نوں سراہاندیاں ہویاں آکھیا اے کہ پاکستان چین لئی انتہائی اہم ملک اے تے علاقائی ترقی لئی ساڈی جدوجہد مشترکہ اے۔