18 دے الیکشن وچ جو ہویا اوہ دوبارہ ہویا تے ملک آگے نہیں چلے گا ،شاہد خاقان عباسی

اسلام آباد (بیو رو رپورٹ) پاکستان مسلم لیگ (ن) دے مرکزی رہنما پچھلے وزیر اعظم شاہد خاقان عباسی نے آکھیا اے کہ 18 دے الیکشن وچ جو ہویا اوہ دوبارہ ہویا تے ملک آگے نہیں چلے گا۔پٹرولیم بحران سرکار نے خود پیدا کیتا۔ موجودہ حکمراناں دی پالیسیاں دے باعث معیشت برباد اے۔ اسیں نظام دی خرابی دی گل کر رہے نیں۔ اقتدار دی نہیں۔ منگل دے روزاحتساب عدالت دے بار میڈیا دے نال گل بات کردیاں ہویاں اوہناں نے آکھیا اے کہ احتساب وچ کارروائی نہیں۔ پچھلا نیب دا کیس نو سال چلیا سی ایہہ وی جلد ختم ہوجاوے گا۔ اوہناں نے مزیدآکھیا اے کہ پارلیمانی نظام یکطرفہ نہیں چل سکدا۔ عوام دی مشکلات پیچھے رہ گئیاں نیں۔ پٹرولیم بحران سرکار نے خود پیدا کیتا اے۔ سرکاردی نکامی اے۔ معیشت برباد اے۔ اسیں نظام دی خرابی دی گل کر رہے آں۔ اقتدار دی نیں۔ شاہد خاقان عباسی نے مزیدآکھیا اے کہ 18 دے الیکشن وچ جو ہویا اوہ دوبارہ ہویا تے ملک آگے نہیں چلے گا۔ایہہ سرکار 2018ء دے چنائو دا نتیجہ اے۔ گل سرکار دے نال نہیں ہووے گی۔ ایہناں اداریاں دے نال ہووے گی جہڑی سیاست اتے اثرانداز اے۔ جہناں وچ فوج، انٹیلی جنس، میڈیا وی شامل اے۔