سپریم کورٹ دا حمزہ شہباز دی درخواست ضمانت اتے نیب نوں نوٹس

اسلام آباد( بیورو رپورٹ) سپریم کورٹ نے حمزہ شہباز دی درخواست ضمانت اتے نیب نوں نوٹس جاری کر دتاجدکہ سلمان شہبازسنے شریک ملزمان دی عدم گرفتاری اتے عدالت عظمی نے برہمی دا اظہارکیتا اے۔جسٹس یحییٰ آفریدی نے ریمارکس دتے کہ میرٹ اتے ضمانت منگنا پہاڑ سر کرن والی گل ہووے گی ،حمزہ شہباز توں منصوب اکائونٹس دا جائزہ لیا تے مشکل ہو جاوے گی۔منگل دے روز سپریم کورٹ دے تن رکنی بنچ نے پنجاب اسمبلی وچ اپوزیشن لیڈر حمزہ شہباز دی درخواست ضمانت اتے کیس دی سماعت کیتی ۔جسٹس یحییٰ آفریدی نے آکھیا ٹرائل کورٹ وچ کسی دے نال امتیازی سلوک نہ ہو وے، سپریم کورٹ حکم دے چکی اے کہ نیب مقدمات دی سماعت روزانہ دی بنیاد اتے ہووے گی۔ عدالت نے سلمان شہباز سنے دیگر شریک ملزمان دی عدم گرفتاری اتے وی اظہار برہمی کیتا تے سارے مفرور ملزمان دی جائیداد ضبطگی دی تفصیلات طلب کر لیاں۔ عدالت نے احتساب عدالت لہوروچ حمزہ شہباز دے خلاف نیب مقدمات دی تفصیل وی طلب کرلیاں نیں۔