لاہور وچ بلدیاتی نمائندیاں دا احتجاج، ٹائون ہال دے تالے توڑ دتے

لہور( پنجابی میڈیا گروپ) بلدیاتی حکومت دی بحالی لئی لہور دے ٹائون ہال اُتے لارڈ میئر تے بلدیاتی نمائندیاں نے احتجاج کیتا تے اندر جان لئی ٹائون ہال دے تالے توڑ دتے۔سپریم کورٹ دے فیصلے توں بعد بلدیاتی نمائندیاں دا ٹائون ہال وچ پہلا اجلاس ہوئیا جس دی صدارت لارڈ میئر لہور کرنل ریٹائرڈ مبشر جاوید نے کیتی۔اجلاس وچ ڈپٹی میئر،چیئرمیناں تے ڈسٹرکٹ کونسل ممبراں دی وڈی تعداد وچ رلت کیتی۔ایس موقع اُتے انتظامیہ نے ٹائون ہال دی مرکزی عمارت نوں تالے لا دتے جس توں بعد بلدیاتی نمائندیاں نے گرائونڈ وچ ہی اجلاس شروع کر دتا۔ اجلاس وچ سپریم کورٹ نوں خراج تحسین پیش کرن دی قرارداد منظور کیتی گئی۔میڈیا نال گل بات کر دیاںکرنل ریٹائرڈ مبشر جاوید ہوراں آکھیا کہ آئینی طور اُتے ادراے بحال ہو گئے نیں مگر پنجاب حکومت جان بجھ کے اوہناں نوں ٹائون ہال دا چارج نہیں دے رہی۔اوہناںنے اعلان کیتا کہ ٹائون ہال بند کرن اُتے توہین عدالت دا مقدمہ دائر کراں گے۔