رپورٹر ارسلان حیدر نوں دھمکیاں دی مذمت کرنے آں: لہور پریس کلب، پی ایف یوجے، ایرا

لہور پریس کلب دے صدر ارشد انصاری، سینئر نائب صدر جاوید فاروقی، نائب صدر سلمان قریشی، سیکرٹری زاہد چوہدری، جوائنٹ سیکرٹری خواجہ نصیر، خزانچی زاہد شیروانی تے اراکین گورننگ باڈی نے لہور پریس کلب دے سینئر کونسل ممبر تے تکمیل دے ایڈیٹر ارسلان حیدر نوں پیشہ ورانہ صحافتی فرائض دی انجام دہی وچ رکاوٹاں پاون تے نامعلوم بندیاں ولوں دھمکی آمیز ٹیلی فون کالز کروان تے پنجاب ہائر ایجوکیشن کمیشن دے چیئرمین، ڈائریکٹر تے دوجے افسراں نے شدید مذمت کیتی اے۔

واضح رہے کہ ڈیلی ٹائمز، جی این این، جیو، کیپٹل سنے دوجے موقر اداریاں وچ خدمات سرانجام دین والے دیانتدار صحافی ارسلان حیدر نے ’تکمیل‘ وچ پنجاب ہائر ایجوکیشن کمیشن دے چیئرمین تے دوجے افسراں دی غفلت تے بے ضابطگیاں دا پردا چاک کرن والی تحقیقاتی فیچر شائع کیتا تے ادارے ولوں شدید ناگواری دا اظہار کیا گیا جد کہ افسران بالا دی ایما تے نامعلوم بندیاں تے نامعلوم نمبر توں ارسلان حیدر نوں دھمکی آمیز فون کال موصول ہوئی جہدے وچ اوہناں نوںپنجاب ہائر ایجوکیشن کمیشن وچ ہون والی مبینہ بے ضابطگیاں، گھپلیاں تے غفلت نوں بے نقاب نہ کرن دا آکھیا گیا دوجی صورت وچ اوہناں نوں سنگین نتائج دی دھمکیاں وی دتیاں گئیاں جب کہ پی ایچ ای سی دے افسراں ولوں وی اوہناں تے شدید دباء پایا جا رہیا اے تے بیروزگار کروان دی دھمکیاں دتی جا رہیاں نیں۔ لہور پریس کلب دی گورننگ باڈی نے صحافی دے نال اعلیٰ افسراں ولوں دھمکیاں دین تے شدید دکھ تے غصے دا اظہار کیتا اے۔ اوہناں نے اپنے مذمتی بیان وچ آکھیا آزادی صحافت تے کسے قسم دی قدغن لگن نہیں دیاں گے، صحافی ملک و قوم دی خدمت دے جذبے نال سرشار نیں تے اوہ ظلم تے ناانصافی دے قلع قمع لئی ہمیشہ سرگرم عمل رہن گے تے کوئی وی طاغوتی قوت اوہناں نوں اوہناں دے فرض توں نہیں روک سکدی۔