سیالکوٹ رمضان بازار واقعہ : وزیراعلی بزدارنال فردوس عاشق دی ملاقات

لہور( پنجابی میڈیا گروپ)وزیراعلی پنجاب نال معاون خصوصی فردوس عاشق اعوان نے ملاقات کیتی تے سیالکوٹ رمضان بازار وچ پیش آن والے واقعے توں آگاہ کیتا۔ عثمان بزدار نے چیف سیکرٹری توں رمضان بازار دے بارے وچ تفصیلی رپورٹ منگ لئی۔دسیا گیا ہے کہ ملاقات وچ چیف سیکرٹری جواد رفیق ملک نے وی رلت کیتی فردوس عاشق اعوان نے رمضان بازار وچ ناقص شیواں دے حوالے نال وزیراعلی نوں بریف کیتا ۔ وزیر اعلی عثمان بزدار نے ہدایت دتی کہ رمضان بازاراں وچ حکومتی پالیسی دے مطابق معیاری شیواں دی دستیابی یقینی بنائی جائے۔ انتظامیہ وی فیلڈ وچآ کے آگاہ کرے۔ اوہناں نے چیف سیکرٹری توں سیالکوٹ رمضان بازار واقعہ بارے تفصیلی رپورٹ منگ لئی۔یاد رہے کہ پچھلے دن سستے رمضان بازاراں وچ ناقص شیواںدی فروخت اُتے معاون خصوصی ڈاکٹر فردوس عاشق اعوان نے اسسٹنٹ کمشنر سیالکوٹ سونیا صدف نوں جھیڑکاں دتیاں سن ۔