پاک افغان سرحد اُتے باڑ لگان دا کم ہر صورت مکمل کیتا جائے گا: شیخ رشید

اسلام آباد( پنجابی میڈیا گروپ)شیخ رشید ہوراں آکھیا کہ ملک دشمن عناصر ساڈے حوصلے پست نہیں کر سکدے، پاک افغان سرحد اُتے باڑ لگان دا کم ہر صورت مکمل کیتا جائے گا۔
وفاقی وزیر داخلہ شیخ رشید نے بلوچستان وچ دہشت گردی دے واقعہ دی مذمت تے ایف سی اہلکاراں دی شہادت اُتے دکھ دا اظہار کیتا۔ اوہناںآکھیا کہ ایف سی اہلکاراں اُتے فائرنگ دا واقعہ انتہائی افسوسناک اے۔
یاد رہے کہ پاک افغان بارڈر اُتے باڑ لگان وچ مصروف ایف سی دے اہلکاراں اُتے سرحد پار توں دہشتگرداں نے حملہ کیتا جس دے نتیجے وچ فرنٹیئر کانسٹیبلری دے حوالدار سنے4جوان شہید جدکہ6زخمی ہوگئے۔
مسلح افواج دے شعبہ تعلقات عامہ ولوںجاری بیان وچ دسیا گیا کہ افغانستان وچ موجود دہشت گرداں نے بلوچستان دے ضلع ژوب دے علاقے مانزاکئی سیکٹر وچ حملہ کیتا۔ ایف سی دے جوان سرحد اپتے باڑ لگان دے عمل وچ مصروف سن۔ ایف سی نے دہشتگرداں دی فائرنگ دا موثر انداز وچ فوری جواب دتا۔