فضل الرحمان نوں صرف حلوہ نہیں ملیا ہور کوئی وجہ نہیں ‘مسرت جمشید چیمہ

لہور( پنجابی میڈیا گروپ) تحریک ا نصاف پنجاب دی سیکرٹری اطلاعات مسرت جمشید چیمہ ہوراں آکھیا کہ مولانا فضل الرحمان دا سبھ توں وڈھا مسئلہ صرف ”حلوے ” دا اے جیہڑا اوہناں نوں نہیں مل رہیا ، بال بال جاندا اے کہ جے یو آئی (ف)کرائے اُتے خدمتاں کرن والی جماعت اے ، مولانا فضل الرحمان نوں صرف ایہ غصہ اے کہ اوہناں نوں ہر دور ونگوں موجودہ حکومت وچ حصہ کیوں نہیں ملیا ، پی ڈی ایم دا اتحاد ہن سیاسی لطیفہ بن گیا اے، ویلا گزاری لئی آپس وچ لتاں کھِچن دا کھیڈ کھیڈ رہے نیں ۔ اپنے بیان وچ مسرت جمشید چیمہ نے آکھیا کہ اپوزیشن بغض وچ اندھی اے کہ ظہرانے تے عشائیے وی عمران خان دے ناں اُتے رکھے جاندے نیں ، عمران خان نے اکیلے اپنے عزم نال نام نہاد تجربہ کاراں نوں اگے لا رکھیا اے۔ اوہناں نے آکھیا کہ مولانا صاحب لنگڑے گھوڑیاں دی دوڑ وچ پہلے نمبر اُتے آنا چاہندے نیں تے اوہناں نے مسلم لیگ (ن) نوں وی ایسی بنیاداں اُتے سبز باغ وکھا رکھے نیں۔ اوہناں نے آکھیا کہ آصف زرداری نے پی ڈی ایم توں بدلہ لینا سی جیہڑا اوس نے لے لیا اے تے ہن پیپلز پارٹی وچ جشن منایا جارہیا اے ۔