گرونانک دیو جی دی بانی وچ انسان دوستی)کلیان سنگھ کلیان پہلے پاکستانی سکھ پی ایچ ڈی سکالر بن گئے

لاہور(سٹاف رپورٹر)کلیان سنگھ کلیان پاکستان دے پہلے پی ایچ ڈی سکالر بن گئے، کلیان سنگھ کلیان نے اورئینٹل کالج پنجاب یونیورسٹی وچ پی ایچ ڈی پنجابی دے مقالے جیہدا سرناواں ’’ گرونانک دیو جی دی بانی وچ انسان دوستی ‘‘ سی دا کامیابی نال دفاع کرلیا۔ ایس موقعے اتے صدر شعبہ پنجابی اورئینٹل کالج ڈاکٹر نبیلہ رحمٰن سمیت کمیٹی دے سارے ارکان نے اوہناں توں سوال جواب توں بعد اوہناں نوں کامیاب قرار دِتا تے ڈگری جاری کرن دی اجازت دِتی۔ تھیسس وچ کلیان سنگھ کلیان دے سپر وائزر ڈاکٹر نوید شہزاد سَن۔ پی ایچ ڈی دے مقالے دے دفاع دے موقعے اتے کلیان سنگھ کلیان دے اہل خانہ تے سجن بیلیاں دی وڈی گنتری موجود سی۔
چیئرمین پنجابی میڈیا گروپ مدثر اقبال بٹ نے وی تقریب وچ اُچیچے طور رَلت کیتی تے کلیان سنگھ کلیان نوں مبارکباد وی دتی۔ مدثر اقبال بٹ ہوراں د ا آکھنا سی کہ کلیان سنگھ کلیان اِک محنتی تے خوش مزاج انسان اے، کلیان دی کامیابی ساڈے لئی باعث فخر اے۔ اوہناں مزیدآکھیا کہ کلیان سنگھ کلیان دا بابا گرونانک دی تعلیمات اُپر پی ایچ ڈی کرنا پوری سکھ برادی لئی وی اعزاز تے فخر دی گل اے۔ ایس موقعے اتے کلیان سنگھ کلیان نے میڈیا نال گل بات کر دیاں آکھیا کہ بابا گرونانک دیو جی مہاراج دی ذات اتے پی ایچ ڈی کرنا میرے لئی اعزاد دی گل اے ۔ اوہناں آکھیا کہ بابا گرونانک جی دی دھرتی اقلیتاں لئی محفوظ تے متبر ک اے۔ مینوں پاکستانی ہون اتے فخر اے۔