لانگ مارچ روکن تے گرفتاریاں کتیاں تے ذمہ دار حکومت ہوئے گی ‘ راجہ پرویز اشرف

مریدکے(پنجابی میڈیا گروپ) پیپلز پارٹی وسطی پنجاب دے صدر راجہ پرویز اشرف نے آکھیا اے پیپلز پارٹی دا لانگ مارچ تریخ دے سبھ ریکارڈ توڑ دیوے گا تے ثابت کردیاں گے اج وی پیپلز پارٹی ملک دی سبھ توں وڈھی عوامی تے سیاسی جماعت اے ۔این اے 119مریدکے توں ٹکٹ ہولڈر چوہدری صابر حسین بھلہ دی قیادت وچ ملن والے وفد نال گل بات کردیاں ہویاں اوہناں نے آکھیا کہ پیپلز پارٹی دا لانگ مارچ جدوں رحیم یارخان دے رستے پنجاب وچ داخل ہوئے گا تے لکھاں کارکن خوش آمدید آکھن گے تے لانگ مارچ وچ شامل ہوجان گے ۔اوہناں نے آکھیا کہ رحیم یار خان توں پنڈی تک 20 اہم شہراں وچ وڈھے اجتماع ہون گے جس نال پارٹی دی قیادت خطاب کرے گی رحیم یار خان توں بعد لودھراں بہاوالپور ملتان وچ وڈھا ڈیرہ لگے گافیر خانیوال ساہیوال چیچہ وطنی اوکاڑہ پتوکی توں بعد لہور وچ ڈیرہ لگے گا،لہور توں بعد مریدکے کامونکی گوجرانوالہ تے فیر وزیر آباد توں ہندا لانگ مارچ گجرات لالہ موسی جائے گا تے آخری مرحلہ کھاریاں جہلم گوجر خان توں ہندا پنڈی اپڑے گا ۔ اوہناں نے آکھیا ساڈھا لانگ مارچ پرامن تے ملک و قوم لئی اے ایس نوں روکن دی کوشش کیتی گئی یا کارکن پھڑے گئے تے حالات دی ذمہ دار حکومت ہوئے گی کیونکہ مہنگائی دی چکی وچ پسی عوام ایس حکومت توں چھٹکارا حاصل کرنا چاہندی اے ۔