منڈی بہائو الدین دے جلسے توں بعد اپوزیشن دیاں نیندراں حرام ہو گئیاں نیں’مسرت جمشید چیمہ

لہور( پنجابی میڈیا گروپ) تحریک انصاف پنجاب دی سیکرٹری اطلاعات مسرت جمشید چیمہ نے آکھیا اے کہ منڈی بہائو الدین دے جلسے وچ عوام دی غیر معمولی تعداد ویکھ کے اپوزیشن والیاں دیاں راتاں دی نیندر حرام ہو گئی اے، جلسے دی نکامی داجھوٹا پراپیگنڈا نہ کرن اُتے لیگی ترجماناں دی ڈانٹ ڈپٹ ہو رہی اے، مریم اورنگزیب صاحبہ تُسی لفظاں دا چنائو سوچ سمجھ کے کیتا کرو ، شیشے دے گھر وچ بیٹھ کے کسی اُتے پتھر نہیں سُٹیاں کردے۔ اپنے بیان مسرت جمشید چیمہ نے آکھیا کہ لیگی ترجمان نوازشریف نوںبھگوڑا ، سند یافتہ ڈاکو تے مفرور لیڈر آکھن اُتے اعتراض ہندا اے ، ساہنوں دَس دیون کہ نواز شریف نوں کیہڑے القابات توں نوازیا جائے ۔ لیگی ترجماناں کول شریف خاندان دے شفاف کردار دی کوئی کہانی موجود اے تے ساہنوں اوس توں آگاہ کرن ، شریف خاندان دی کرپشن ، لُٹ مار دی اینہی کہانیاں نیں جس نال کتاباں شائع ہو سکدیاں نیں۔