قومی سلامتی لئی پرعزم ہاں،27 فروری والے دن بھارت نوں ثابت کر کے وکھا دتا سی:وزیراعظم

اسلام آباد( پنجابی میڈیا گروپ) ملک تے اپنی قوم دی سلامتی لئی پرعزم تے غیر متزلزل ہاں،27 فروری2019 والے دن بھارت نوں ثابت کرکے وکھایا ۔ مذاکرات نوں کدی وی کمزوری دی علامت نہیں سمجھنا چاہیدا ۔ وزیراعظم عمران خان نے ٹویٹر پیغام وچ آکھیا اے کہ ہمیشہ مذاکرات تے سفارت کاری ذریعے تنازعے حل کرن اُتے یقین رکھدا ہاں، مذاکرات نوں کدی وی کمزوری دی علامت نہیں سمجھنا چاہیدا ، اسیں27 فروری2019 والے دن بھارت نوں ثابت کرکے وکھایا جد اوس نے حملے دا انتخاب کیتا۔اوہناں نے آکھیا کہ قوم دی حمایت نال ساڈھی فوج ہر سطح اُتے جارحیت دا جواب دیوے گی تے غالب آئے گی۔ یاد رہے کہ 3 ورھے پہلاں27 فروری نوں پاکستان نے کمزور بھارتی ہوابازاں نوں چھٹی دا دُدھ یاد کرا کے تریخ رقم کیتی سی ۔2بھارتی جنگی جہاز زمین بوس ہوئے جدکہ بھارتی ہوا باز ابھینندن گرفتار کر لیا گیا سی، ایس معرکے نال منسوب پاک فضائیہ دی جنگی گیلری آپریشن سوئفٹ ریٹارٹ وچ ابھینندن دے زیراستعمال یونیفارم تے جنگی ہوابازی وچ استعمال ہون والا ساہمان دشمن دی پسپائی دی داستان سُنا رہیا اے۔گیلری دی اک دیوار اُتے ابھینندن دے طیارے نوں مارسُٹن والے ونگ کمانڈر نعمان علی خان، بھارت دے دُوجے جہاز نوںمارسُٹن والے سکوارڈن لیڈر حسن صدیقی جدکہ بھارت دے خلاف اہم مشن وچ شامل گروپ کیپٹن فہیم خان دی تصویراں آویزاں نیں۔27فروری نوں پاک فضائیہ دی جرات دا ایہ پہلا واقعہ نہیں اے، پاکستان تے بھارت دے درمیان جنگاں دے دوران پاکستان ائیرفورس ولوں دشمن ملک دے ہوابازاں نوںناکوں چنے چبوانے تے اوہناں نوں کاری ضرب لان دیاں داستاناں بکھریاں۔