اپنی ماں دے اصرار اُتے فلماں وچ آیا: شان

لہور( پنجابی میڈیا گروپ) لالی ووڈ سٹار شان نے آکھیا کہ اپنی ماں دے اصرار اُتے فلماں وچ کم دا آغازکیتا، پہلی فلم”بلندی ” لئی ساری رات ڈائیلاگ یاد کردا رہیا لیکن سویرے سیٹ اُتے جا کے بھُل گیا سی، پہلے دن توں لے اج تک سیکھن دے عمل توں گزر رہا واں۔ اک انٹر ویو وچ شان نے دسیا کہ جد امریکہ توں واپس آیا تے ماں ہوراں آکھیا کہ فلم انڈسٹری وچ تُسی پیو دے قدماں دے نشان ہو تے میری خواہش اے کہ اوہناں دا کوئی بال اوہناں دے قدماں دے اُتے چلے ۔ فلم دے سیٹ اُتے گیا تے کوئی وال بنا رہیا اے کوئی کپڑے پا رہیا اے تے میں سوچ وچ پہ گیا میرے نال ایہ کیہ ہو رہیا اے ، مینوں دسیا گیا کہ تُسی اینج چلنا اے ،میں فلم لئی ساری رات ڈائیلاگ ہی یاد کیتے سن۔