حکومت ہر صورت اقلیتاں دی حفاظت نوں یقینی بنائے گی’چوہدری سرور

لہور( پنجابی میڈیا گروپ)گور نر پنجاب چوہدری محمدسرور نے آکھیا اے کہ حکومت ہر صورت اقلیتاں دا تحفظ تے اوہناں دی مذہبی آزادی نوں یقینی بنائے گی، آئین پاکستان کسی وی مذہب دا امتیاز کیتیوں بغیر ہر فرد دے بنیادی حقوق دی حفاظت کردا اے،اَت گرداں دے خلاف وی پاکستان وچ وَسن والے سارے مذہباں دے لوگ متحد نیں، بھارت وچ مودی دی نگرانی وچ اقلیتاں دا قتل عام ہو رہیا اے تے مذہبی آزادی دا وی کوئی وجود نہیں ، اقوام متحدہ سنے انسانی حقوق دے عالمی اداریاں نوں بھارت وچ اقلیتاں اُتے ظلم دا سخت تے فوری نوٹس لینا چاہیدا اے ۔ اوہ گور نر ہائوس لہور وچ صوبائی وزیر اقلیتی امور اعجاز عالم تے ہوراں دی قیادت وچ ملاقات کرن والے وفد نال گل بات کر رہے سن جدکہ اعجاز عالم نے گورنر پنجاب نوں صوبہ وچ اقلیتاں دی فلاح وبہبود لئی کیتے جان والے اقدامات بارے وچ دسیا۔گورنر پنجاب چوہدری محمدسرور نے وفد نال گل بات دے دوران آکھیا کہ الحمد للہ پاکستان وچ عیسائیاں ، ہندوواں تے سکھاں سنے سارے اقلیتی امن طریقے نال مکمل مذہبی آزادی نال زندگی گزار رہے نیں تے اوہناں نوں سارے حقوق پوری طرح میسر نیں