پورے برصغیر وچ سبھ توں سستا پیٹرول اسیں دے رہے آں، وزیراعظم

اسلام آباد (پنجابی میڈیا گروپ) وزیر اعظم عمران خان نے آکھیا اے کہ اللہ دا شکر اے ٹیکس کلیکشن ودھدی جا رہی اے، اسی پیٹرول تے 10 روپے چھوٹ دین دے قابل ہوئے ، سارے برصغیر وچ سب توں سستا پیٹرول اسی دے رہے آں، جدوں جدوں ٹیکس مزید ودھے گا تے نچلے طبقے نوں مزید سہولتاں دواں گے، دنیا بھر وچ مہنگائی دی لہر آگئی اے، احساس راشن رعایت پروگرام ایس لئی لانچ کر رہے آں، احساس رعایت راشن اسکیم دے تحت 2 کروڑ خانداناں نوں 30 فیصد ماہانہ رعایت دتی جاویگی، خواتین دے تعلیم یافتہ تے بااختیار ہون تک ملک ترقی نہیں کرسکدا۔ احساس راشن رعایت اسکیم دے اجرا دی تقریب نال خطاب کردے ہوئے وزیراعظم نے آکھیاکہ انسانیت دا درد رکھن والا شخص ہی فلاحی کم کر سکدا اے، انسانیت دی خدمت اللہ تعالیٰ نوں بہت پسند اے، موجودہ حکومت نے ملک دی تاریخ دا بہت وڈا احساس پروگرام شروع کیتا اے جو مدینہ دی ریاست دے روڈ میپ دا حصہ اے، ریاست دی ذمہ داری اے کہ جو طبقہ ترقی وچ پِچھے رہ گیا اے اوہنوں ترقی دے عمل وچ شامل کیتا جاوے۔