تحریک آزادی دے ہیرو، دھرتی دے سورمے بھگت سنگھ دی یاد وچ تقریب

لاہور(سٹاف رپورٹر)پنجابی یونین دے زیر اہتمام پچھلے دیہاڑے پنجاب دے ہیرو بھگت سنگھ دی شہادت دے حوالے نال پنجاب ہاؤس وچ دھرتی دے شیر بھگت سنگھ نوں سلامی دے عنوان نال اک پر وقار تقریب منعقد کیتی گئی جہدے وچ مقررین نے بھگت سنگھ دی آزادی لئی انگریز سامراج نال ٹکران ،اوہنا ںنوں پھاہا دے کے شہید کیتے جان دے اسباب تے اوہناں دے تحریک آزادی تے اثرات دے حوالے نال روشنی پائی ۔ تقریب دی صدارت پنجابی زبان تحریک دے سربراہ و دانشور الیاس گھمن نے کیتی۔ مہمانان خصوصی وچ پروفیسر کلیان سنگھ کلیان ،قاضی طارق عزیز،میاں آصف پنجابی تے بلال مدثر بٹ سن۔ میزبانی پنجابی یونین دے چیئرمین مدثراقبال بٹ نے کیتی۔ اسٹیج سیکرٹری دے فرائض پنجابی میڈیا گروپ دے صدر ندیم رضا نے نبھائے ۔تقریب نال خطاب کردیاں ہویاں پنجابی یونین دے چیئرمین مدثر اقبال بٹ نے آکھیا کہ پنجاب بہادراں، صوفیاں تے شاعراں دی سر زمین اے۔ پنجاب ہاؤس دا مقصد پنجاب لئی کم کرن تے قربانیاں دین والیاں لئی کم کرنا تے نویں نسل نوں اوہناں دے کم تے قربانیاں توں آگاہی دینا اے۔ بھگت سنگھ نے ایس دھرتی لئی اپنی جان دی قربانی دتی اے ساڈا فرض اے کہ اسیں اپنی آئون والی نسل نوں ایس عظیم قربانی بارے دسیے ۔معروف صحافی تے دانشور قاضی طارق عزیز نے آکھیا کہ اج اسیں پنجاب ہاؤس وچ پنجاب دے ایس پتر نوں خراج تحسین پیش کر رہے آں جس نے اپنے وقت دی سب توں وڈی طاقت نال ٹکر لئی سی۔بھگت سنگھ تے اوہناں دے ساتھیاںدا دن منا کے مدثر اقبال بٹ نے تریخی کم کیتا اے۔ اسیں پنجاب دے حقاں لئی مدثر اقبال بٹ دی قیادت وچ انج ای کم کراں گے جیویں بھگت سنگھ نے آزادی لئی کیتا سی ۔پروفیسر ڈاکٹر کلیان سنگھ کلیان نے آکھیا کہ ساڈی تریخ انج دی اے جہدے اُتے اسیں جناں وی فخر کریئے گھٹ ایسانوں ایہ طعنہ دینا کہ پنجابیاں نے حملہ آوراں دا مقابلہ کرن دی بجائے اوہناں نوں رستہ دتا سی تریخ توں ناواقفیت تے مسخ کرن والی گل اے برصغیر دا واحد علاقہ پنجاب اے جتھے ایتھوں سے پنجابیاں نے حکومت کیتی ورنہ پورے برصغیر وچ کوئی انج دا علاقہ نہیں جتھے اوہناں دے مقامی لوکاں دی سرکار ہووے۔ اوہناں نے آکھیا کہ ایہ تصور وی غلطی تے مبنی اے کہ دسویں گرو دی لڑائی مسلماناں دے خلاف سی بلکہ مسلماناں نے اوہناں دا ساتھ دتا سی اوہناں نوں تے اوہناں دے خاندان نوں پناہ دتی سی ۔اوہناں نے آکھیا کہ بھگت سنگھ ،راج گرور تے دت نے جی سی دی اوول گراؤنڈ وچ بیٹھ کے انگریز حکومت نوں ٹف ٹائم دین دی منصوبہ بندی کیتی سی تے ٹف ٹائم وی دتا سی۔ بھگت سنگھ نوں پھانسی کانگرس تے گاندھی دی وجہ توں دتی گئی سی ۔قائد اعظم دا برطانوی حکومت توں مطالبہ سی کہ بھگت سنگھ تے اوہناں دے ساتھی سیاسی قیدی نیں ، اوہناں دے نال ساسی قیدیاں والا سلوک کیتا جائے جدکہ گاندھی نے اوہناں دی کارروائی نوں دہشت گردی دی کارروائی قرار دتا سی ۔بھگت سنگھ دے بعد جنی وی آزادی دی تحریکاں چلیاں اوہناں وچ کسے نہ کسے صورت بھگت سنگھ دا ناں ضرور لیا گیا ۔میاں آصف پنجابی نے آکھیا کہ بھگت سنگھ دی پھانسی دے ذمہ دار گاندھی نیں جنہاں نے اوہناں نوں سیاسی قیدی تسلیم نہیں کیتا سی تے اوہناں دی رہائی دی مخالفت کیتی سی بھگت سنگھ کسے تعریف دے محتاج نہیں اوہناں دی تعریف کرکے ساڈا قد وڈا ہندا اے ۔جنرل منیجر پنجابی میڈیا گروپ رضوان اصغر بٹ نے آکھیا کہ پنجاب دھرتی دی پہچان ای دلیری تے مزاحمت اے، اج اسیں دھرتی دے ایس سپوت دی یاد وچ اکٹھے ہوئے آں جس نے انگریز سامراج دے ظلم دے خلاف جدو جہد کیتی۔پنجابی زبان تحریک دے راہنما الیاس گھمن نے آکھیا کہ تریخ نوں بھلن والیاں نوں تاریخ بُھل جاندی اے ، بھگت سنگھ پیدا ای اوس گھرانے وچ ہوئے سن جتھے چاچا سورن سنگھ پہلا ای ایہ کم کر رہے سن جدوں اوہ لائلپور توں لہور آئے تے اوہ لالہ لجپت رائے تے کرتار سنگھ سروپا توں متاثر ہوئے کرتار سنگھ سروپا نوں آزادی لئی اواز چُکن تے 19سال دی عمر وچ سنٹرل جیل وچ پھانسی دی دتی گئی سی اوہ امریکا توں پورے خاندان سنے وطن دی ازادی دی لڑائی لڑن لئی پنجاب آئے سن ،اخبار وی شائع کردے سن ۔قائد اعظم نے بھگت سنگھ تے اوہناں دے ساتھیاں دا کیس لڑن دی پیشکش کیتی سی انگریزجنرل ڈائر نوں قتل کرن والے اُدھم سنگھ توں جنرل ڈائر نے جدوں اوہدا نال پچھیا تے اوہناں نے اپنا ناں رام محمد سنگھ آزاد دسیا سی۔ بھگت سنگھ نال جیل وچ ملاقات وی کیتی سی ۔اوہناں نے آکھیا کہ مدثر اقبال بٹ پنجاب دی تریخ ،ثقافت تے زبان دے محافظ نیں اوہ پنجاب دے حوالے نال ہر دن منان دا اہتمام کردے نیں ایہ سلسلہ ایسے طرحاں جاری رہنا چاہیدا اے ۔ایس موقعے تے اسٹیج سیکرٹری ندیم رضا نے بھگت سنگھ دی پھانسی دے حوالے نال دسیا کہ پھاہا ویلے مجسٹریٹ نے معذرت کر لئی سی اوہ پھانسی گھاٹ ای نہیں آئے سن ایہ کم اک اعزازی مجسٹریٹ توں لیا گیا سی بعدوں ایس اعزازی مجسٹریٹ نوں اوسے پھانسی گھاٹ والی تھاں تے قتل کیتا گیا سی۔