ہارس ٹریڈنگ دے خلاف27مارچ نوں پوری قوم باہر نکلے،وزیر اعظم

اسلام آباد(پنجابی میڈیا گروپ) وزیراعظم عمران خان نے قوم توں اپیل کیتی اے کہ27مارچ نوں پوری قوم باہر نکلے تاکہ آئندہ کوئی وی ہارس ٹریڈنگ دی جرات نہ کر سکے۔وزیراعظم عمران خان نے قوم دے ناں مختصر پیغام جاری کیتا اے جس وچ اوہناں نے آکھیاکہ قرآن پاک وچ اللہ تعالیٰ مسلماناں نوں آکھدا اے کہ” تُسی اچھائی نال تے برائی دے خلاف کھڑے ہونا اے”عمران خان نے آکھیاکہ اج ڈاکوواں دا ٹولہ جیہڑا30ورھیاں توں ایس ملک نوں لُٹ رہیا اے تے کرپشن کر رہیا اے، پیسے باہر گھل رہیا اے، اوہ اکٹھا ہو کے عوامی نمائندیاں دے ضمیر دیاں قیمتاں لا کے اوہناں نوں کھلے عام خرید رہیا اے۔وزیراعظم نے آکھیاکہ میں ایہ چاہندا ہاں کہ ساری قوم27 تریخ نوں میرے نال نکلے،صرف اک پیغام دین لئی کہ ایہ جو ملک وچ جمہوریت تے قوم دے خلاف جرم ہو رہیا اے، چوری دے پیسیاں نال لوکاںدے ضمیر خریدے جا رہیے نیں، پوری قوم اوس دے خلاف اے۔اوہناں نے آکھیا کہ27تریخ نوں قوم نکلے تاکہ سارے پاکستان نوں پتہ چل جائے تے آئندہ کسی دی جرات نہ ہوئے کہ اوہ اینج ہارس ٹریڈنگ کر کے ایس ملک دی جمہوریت تے قوم نوں نقصان پہنچائے۔یاد رہے کہ پاکستان تحریک انصاف نے27 مارچ نوں ڈی چوک اُتے جلسہ کرن دااعلان کر رکھیا اے جدکہ اوسی دن اپوزیشن نے وی اسلام آباد وچ جلسے دا اعلان کیتااے۔