ایمرجنسی قنون دا حصہ اے،الیکشن چھیتی وی ہو سکدے نیں، شیخ رشید

اسلام آباد(پنجابی میڈیا گروپ)وفاقی وزیر داخلہ شیخ رشید نے آکھیا کہ ایمرجنسی قنون دا حصہ اے تے میں وزیر اعظم نوں سندھ وچ گورنر راج تے ایمرجنسی لان دی تجویز دتی سی،جیہڑے لوگ پارٹیاں بدل رہے نیں اوہناں دے ذہن وچ ہونا چاہیدا کہ پاکستان وچ الیکشن چھیتی وی ہو سکدے نیں ،اپوزیشن والے25یا26 نوں نکلاں گے،اگر ضرورت پیش آئی تے اک ہزار ایف سی یا اک ہزار رینجرز تے بلا لین گے،وزارت داخلہ کول(ن)لیگ دی کوئی درخواست نہیں آئی،کل کوئی شرارت یا کوئی مسئلہ ہو جائے تے وزارت داخلہ اوس دی ذمے دار نہیں ہوئے گی۔ جمعرات نوں ایتھے پریس کانفرنس کردیاں ہویاں شیخ رشید نے آکھیا کہ اپوزیشن والے25 یا26 تریخ نوں نکلن گے تے میں اسلام آباد انتظامیہ نوں آکھیا اے کہ اوہناں نال رابطہ کرن، اسیں دو ہزار رینجر،اک ہزار ایف سی تے9ہزار پلس سنے12ہزار سیکیورٹی مقرر کیتی اے۔اگر ضرورت پئی تے اک ہزار ایف سی یا اک ہزار رینجرز ہور بلا لاں گے، ایہ کم اسیں سپریم کورٹ دی ہدایت اُتے کیتا اے کہ دوناں جماعتاں نوں جلسے دی اجازت دے دتی اے