’’شہید بھگت سنگھ۔ ازادی دی لہر دا انقلابی ہیرو‘‘ سیمینار

بھگت سنگھ دی سوچ اج وی زندہ اے، رانا شاہد سلیم، بھگت سنگھ دھرتی دا پُتر اے، مدثر اقبال بٹ، پھانسی دین والے مجسٹریٹ نے وی دستخط کرن توں انکار کر دتا سی، کلیان سنگھ کلیان
بھگت سنگھ نوں انقلابی سوچ پریوار توں ملی، سردار امیر سنگھ، سکھ کمیونٹی پاکستان دی ترقی وچ اپنا بھرواں حصہ پا رہی اے، رمیش سنگھ اروڑا، ساہنوں انقلابیاں دی لوڑ اے، سہیل رضا تے ہور رلتیاں دا خطاب

(لاہور، نمائندہ خصوصی) دیال سنگھ ریسرچ اینڈ کلچرل فورم وِکھے’’ شہید سردار بھگت سنگھ …. ازادی لہر دا انقلابی ہیرو ‘‘وِشے اتے سیمینار کروایا گیا۔ ڈائریکٹر دیال سنگھ ریسرچ اینڈ کلچرل فورم نے استقبالیہ پیش کیتا تے بھگت سنگھ دی عظیم قربانی نوں شردھانجلی بھیٹ کردیاں کہیا کہ براعظم دی آزادی دی لہر وچ کئی نامور شخصیتاں دیاں کوششاں تے اوہناں دا رَت شامل اے۔ ایہناں ہستیاں وچ اِک مہان ہستی بھگت سنگھ دی وی اے۔ سردار بھگت سنگھ دی شخصت دیش بھگتی، قوم نال وفاداری تے ماتر بھومی واسطے قربانی دا نشان اے۔ قائداعظم محمد علی جناحؒ نے بھگت سنگھ دی جدوجہد دی حمایت وچ لٹولم اسمبلی وچ اواز بلند کیتی ا تے بھگت سنگھ تے اوہدے ساتھیاں اُتے جیل وچ تشدد کرن تے احتجاج کیتا۔
کلیان سنگھ کلیان اسسٹنٹ پروفیسرجی سی یونیورسٹی لاہور نے اپنے وچار پرگٹائوندیاں کہیا کہ بھگت سنگھ نوں پھانسی دین لئی مجسٹریٹ نے وی دستخط نہیں سن کیتے۔ پر حکومت خوفزدہ سی جیس کرکے اوہناں آنریری مجسٹریٹ تعینات کرکے اوہدے کولوں بھگت سنگھ دی پھانسی اتے دستخط کروائے۔
پروفیسر ارشد اقبال ارشد ڈائریکٹر شعبہ پنجابی گورنمنٹ دیال سنگھ کالج ، لاہور نے سیمینار نوں سمبودھن کردیاں کہیا کہ بھگت سنگھ ساڈا ازادی دا ہیرو اے تے بھگت سنگھ دی سوچ تے فکر اتے بہت ساریاں کتاباں وی چھاپیا جاچکیا نیں۔
ڈاکٹر صائمہ بتول اسسٹنٹ پروفیسر لاہور کالج یونیورسٹی لاہور نے بھگت سنگھ نوں شردھانجلی بھیٹ کردیاں اوہناں دی شخصیت تے اوہناں دے کیتے ازادی کماں اتے مقالہ پڑھیا۔
سہیل رضا ڈائریکٹر اِنٹرفیتھ ہارمنی منہاج یونیورسٹی، لاہور نے سیمینار نوں سمودھن کردیاں کہیا کہ چھوٹی عمرے اِی بھگت سنگھ دا ناں سامراجی طاقتاں دے خلاف اِک مزاحمت دے نشان دے طور تے جانیا جان لگ پیا سی۔ سانوں اج وی ایہو جیہے انقلابیاں دی لوڑ اے۔ شہید بھگت سنگھ ساڈا ورثہ اے۔
اقبال مغل سپوکس مین بھگت سنگھ میموریل فائونڈیشن لاہور نے کہیا کہ بھگت سنگھ اتے 1919 وچ ہوئے جلیانوالے باغ دے گھلوگھارے دا بہت اثر پیا سی۔ اوہناں کہیا کہ میرے دادا تے بھگت سنگھ دی آپسی دوستی سی تے بھگت سنگھ لاہور وچ ساڈے گھر رہندے رہے نیں۔ اوہناں نے اپنے پریوار دے گرو صاحبان نال تعلقات دی دس وی پائی۔
ڈاکٹر شاہدہ تارڑ لاہور کالج فار ویمن یونیورسٹی لاہور نے بھگت سنگھ دے انقلابی ہیرو ہون تے اپنا مقالہ پیش کیتا۔
سردار امیر سنگھ پردھان پاکستان سکھ گردوارا پربندھک کمیٹی نے سیمینار نوں سمبودھن کردیاں کہیا کہ بھگت سنگھ نوں انقلابی وچار اپنے پریوار توں ملے سن۔ سانوں اج وی بھگت سنگھ ورگے یودھیاں دی لوڑ ہے۔ بھگت سنگھ کسے اِک قوم دا نہیں بلکہ اوہ ساڈا ساریاں دا سانجھا شہید ہے۔
رمیش سنگھ اروڑا ایم پی اے پاکستانی پنجاب اسمبلی نے کہیا کہ سانوں لوڑ ہے کہ ایس یودھے نوں اپنے سلیبس وچ جگہ دِتی جاوے۔ اوہناں کہیا کہ پاکستان وچ سکھ کسے وی میدان وچ پچھے نہیں۔ اسیں پاکستان وچ محفوظ آں تے ساہنوں پاکستانی ہون اتے فخر اے۔
جیکولن چیئرپرسن مائنورٹی افیئرز نے گل کردیاں کہیا کہ سانوں اپنیاں بچیاں نوں اپنے ہیروواں بارے دسنا چاہیدا ہے۔ بھگت سنگھ بارے سانوں اپنے بچیاں نوں دسنا چاہیدا ہے۔
رانا سلیم ایڈیشنل سیکرٹری شرائنز متروکہ وقف املاک بورڈ، لاہور نے اپنے وچار سانجھے کردیاں کہیا کہ بھگت سنگھ کسے انسان دا ناں نہیں، نہ کسے ادارے دا ناں ہے، بھگت سنگھ اِک سوچ دا ناں اے۔ اوہناں کہیا کہ بھگت سنگھ دا کہنا سی کہ تسیں مینوں تے مار سکدے او پر میری سوچ تے میرے نظریات نوں نہیں مار سکدے۔