طاہرہ سراء دی کتاب ’’شیشا‘‘ نوں چمن یادگاری پُرسکار نال نوازیا گیا

(لاہور)ضلع شیخوپورہ دے قصبے منڈی ڈھابہ سنگھ، صفدر آباد ( پاکستان) وسدی عالمی شہرت یافتہ شاعرہ طاہرہ سرا نُوں پاک ہیریٹیج ہوٹل لہور دے آڈیٹوریم وِچ31ویں بین الاقوامی پنجابی امن کانفرنس وچ شامل سارے مندوبین تے پاکستانی ادیباں تے شاعراں دی حاضری وِچ شاہ چمن یادگاری پُر سکار( انعام)2021ء نال نوازیا گیا، ایس موقع اُتے پنجابی لوک وراثت اکادمی دے چیئرمین پرو فیسر گُربھجن گِل نے دسیاکہ شاہ چمن یادگاری پُر سکار پچھلے7ورھیاں توں دِتاجا رہیا اے،50ورھے توں گھٹ عمر دے ادیباں تے شاعراں دا انتخاب اک کمیٹی کر دی اے۔جِنہاں لکھاریاں نُوں ایہہ انعام دتا گیا اے۔اوہناں دے ناں ایس پرکار ہن، جسونت ظفر(2015ء)،گورُمیت کڑیالوی(2016ء)،سُریندر نیر(2017ء)،دیس راج کالی تے گُورپریت مانسہ(2018ء)،گوروندر جودھا(2019ء)تے نیتواروڑہ(2020ء)۔ ایس موقع اُتے طاہرہ سرا دی شاعری دی کتاب ’’ شیشہ‘‘ دا دُوجا ایڈیشن ریلیز کیتا گیا،ڈاکٹر دیپک منموہن سنگھ نے صدارتی خطبے وِچ شاہ چمن نال گُذارے،اپنے خوبصورت پلاں نُوں یاد کیتا،ایس اکٹھ وچ حاضر ہر جیت سنگھ سوہی، ڈاکٹر نریندر سنگھ کوشل،امر پال سنگھ رندھاوا، جسدیوسنگھ سیکھوں، وقاص حیدر،شیخ ایاز، جسوندر کورگِل، ڈاکٹر جسوندر کور مانگٹ تے امن دیپ کورسیکھوں نے طاہرہ سرا نُوں مبارک دِتی۔مگروں مشاعرے وِچ طاہرہ سرا نے اپنی زندگی تے ادبی سفر بارے تفصیل نال جانکاری دِتی، تے اپنیاں غزلاں، نظماں تے بولیاں سُنایاں۔ مشاعرے وِچ بابا نجمی، گُر بھجن گِل، سیہج پریت مانگٹ، گورُتیج کوہاروالا،ترسیال کور،ستیش گلاٹی،ڈاکٹر سلطانہ بیگم، ہروندر چندی گڑھ، ترلوک بیرامریکہ، درشن بلندوی، عظیم شیکھر یُوکے تے امن دیپ پھلڑ نے وی اپنا کلام سُنایا۔